අමාත්‍යවරුන් වන මනුෂ නානායක්කාර සහ හරින් ප්‍රනාන්දු යන මහත්වරුන්ගේ පක්ෂ සාමාජිකත්වය අහිමි කිරීමට සමගි ජන බලවේගය ගනු ලැබූ තීරණය නිත්‍යානුකූල බව ශ්‍රේෂ්ඨාධිකරණය තීන්දු කිරීමත් සමග මේ වන විට ආණ්ඩුව යම් දෙදරීමකට ලක්ව තිබෙනවා.
ඒ මෙම තීරණයත් සමඟ රනිල් වික්‍රමසිංහ මහතාට සහය දක්වන පාර්ලිමේන්තු මන්ත්‍රිවරුන් දෙදෙනෙකුගේ මන්ත්‍රී ධූරයද අහිමිවී යාම හේතුවෙන්.
මෙම අධිකරණ තීන්දුව පාර්ලිමේන්තු මහලේකම්වරියට ලැබුණු පසු ඇය විසින් මෙම මන්ත්‍රී ධුර හිස් වී ඇති බවට මැතිවරණ කොමිසන් සභාව වෙත දැනුම් දෙනු ඇති.
ඒ අනුව මැතිවරණ කොමිසම මෙම මන්ත්‍රී ධූර දෙක හිස්ව ඇති බවට රජයේ මුද්‍රණාලයට දැනුම් දුන් පසුව එය ගැසට් නිවේදනයක් මගින් ප්‍රසිද්ධියට පත්කිරීමට නියමිතයි.
අමාත්‍ය මනූෂ නානායක්කාර සමගි ජනබලවේගය පක්ෂයෙන් ගාල්ල දිස්ත්‍රික්කයෙන් මැතිවරණයට ඉදිරිපත් වී ජයග්‍රහණය කළ මන්ත්‍රීවරයෙක් වනවා.
ඒ අනුව ඔහුට එම අසුන අහිමි වුවහොත් ගාල්ල දිස්ත්‍රික්කයේ සමගි ජනබලවේගය පක්ෂයේ මනාප ලැයිස්තුවේ ඊළගට සිටින්නේ මනාප 34,897 ක් ලබාගත් බන්දුල ලාල් බණ්ඩාරිගොඩ මහතා වනවා.
