පාර්ලිමේන්තු මන්ත්‍රී රිෂාඩ් බදියුදින්ගේ නිවසේ සේවයේ යෙදී සිටි 16 හැවිරිදි ඉශාලිනි ජූඩ් දැරිය පිළිස්සුම් තුවාල ලබා කොළඹ ජාතික රෝහලට ඇතුළත් කිරීමෙන් පසු මියගියේ ඉකුත් ජුලි මස 15 වනදායි.
අනතුරුව එම සිදුවීම සම්බන්ධයෙන් පොලිස් කණ්ඩායම් කිහිපයක් සහ අපරාධ පරීක්ෂණ දෙපාර්තමේන්තුව විමර්ශන ආරම්භ කළ අතර එහිදි සිදුවීමට සැකපිට රිෂාඩ් බදියුදින්ගේ බිරිද, මාමණ්ඩිය, මස්සිනා සහ දැරිය නිවසට ගෙනගිය තැරැව්කරු අත්අඩංගුවට ගැනුනා.
එසේම දැරියගේ මරණය සම්බන්ධයෙන් සිදුකළ පශ්චාත් මරණ පරික්ෂණයේදි ඇයට දීර්ඝ කාලයක සිට ලිංගික ප්‍රවේශයක් සිදුව ඇති බවත්, පිළිස්සුම් තුවාල මත විෂබීජ ආසාදනයක් හේතුවෙන් ඇති වු කම්පනයකින් මරණය සිදුව ඇති බවත් අනාවරණය වුණා.
කෙසේවෙතත්, රිෂාඩ් බදියුදින්ගේ බිරිඳ හා මාමණ්ඩිය ලබන 17 වන දින දක්වා තවදුරටත් රක්ෂිත බන්ධනාගාරගත කිරීමට කොළඹ අතිරේක මහේස්ත්‍රාත් රජින්ද්‍රා ජයසුරිය මහත්මිය අද (06) නියෝග කළා.
ඔවුන් ඇප මත මුදා හැරිය හොත් සාක්ෂි වලට බලපෑම් ඇති විය හැකි බවට නිරීක්ෂණය වන හෙයින් මෙම තීන්දුව ලබාදෙන බවයි මහේස්ත්‍රාත්වරිය තීන්දුව ලබා දෙමින් ප්‍රකාශ කර සිටියේ.
කෙසේ වෙතත්, තරවුකරු රුපියල් ලක්ෂ තුනක ශරීර ඇප දෙකක් මත හා නිවසේ මිට පෙර සේවය කල දැරියන් දෙදෙනෙකු දුෂණය කලේ යයි චෝදනා ලබා සිටින රිෂාඩ් බදුර්දින්ගේ මස්සිනා රුපියල් ලක්ෂ පහක ශරීර ඇප දෙකක් මත මුදා හැරීමටත් මහේස්ත්‍රාත්වරිය නියම කළා. ඒ, අදාල සැකකරුවන් දෙදෙනා සම්බන්ධයෙන් රක්ෂිත බන්ධනාගාරගත කිරීමට තරම් ඇප පනත ප්‍රකාරව පැමිණිල්ල විසින් කරුණු ඉරිරිපත් කර නොමැති බවට සඳහන් කරමින්.
