පසුගිය දා අවසන් වූ 05 වසර ශිෂ්යත්ව විභාගයේ පළමු ප්රශ්න පත්රයේ කලින් පිටවූ ප්රශ්න තුන සඳහා නිදහස් ලකුණු ලබාදීමට ගෙන තිබෙන තීරණය තුළින් මූලික මිනිස් අයිතිවාසිකම් උල්ලංඝනය වන බව ශ්රේෂ්ඨාධිකරණය තීන්දු කර තිබෙනවා.
ඒ, එම විභාගයට සහභාගී වූ සිසු සිසුවියන් හා ඔවුන්ගේ දෙමව්පියන් විසින් ගොනුකළ මූලික අයිතිවාසිකම් පෙත්සම් හතරක් විභාග කිරීමෙන් අනතුරුවයි.
යසන්ත කෝදාගොඩ, කුමුදුනී වික්රමසිංහ සහ අර්ජුන ඔබේසේකර යන මහත්ම මහත්මීන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල විසින් මෙම තීන්දුව ප්රකාශයට පත් කළා.
එමෙන්ම, මෙම ගැටලුව නිරාකරණය කිරීම සඳහා විශේෂඥයින් විසින් ඉදිරිපත් කර තිබෙන නිර්දේශය තුන අතුරින් සුදුසු නිර්දේශයක් තෝරා ගෙන වහාම එය ක්රියාත්මක කිරීමට පියවර ගන්නා ලෙස විනිසුරු මඩුල්ල විසින් විභාග කොමසාරිස් ජනරාල්වරයාට නියෝග කර තිබෙනවා.
තවද මෙම ප්රශ්න පත්ර පිටවීමට සම්බන්ධ බවට සැකකරන පුද්ගලයින් වන අයි.ජී.එස්. ප්රේමතිලක විසින් රුපියල් මිලියන තුනක් සහ චමින්ද කුමාර ඉළඟසිංහ විසින් රුපියල් මිලියන දෙකක්ද වන්දි වශයෙන් රජයට ගෙවිය යුතු බවටත් නියෝග කෙරුණා.
අදාළ පෙත්සම් තුළින් පෙත්සම්කරුවන් සදහන් කර තිබූණේ පහ වසර ශිෂ්යත්ව විභාගයේ පළමු ප්රශ්න පත්රයේ ප්රශ්න තුනක් කලින් පිටවීම හේතුවෙන් එම ප්රශ්න තුන සඳහා එම විභාගයට පෙනී සිටි සියලු සිසු සිසුවියන්ට නිදහස් ලකුණු ලබාදීමට රජය ගෙන තිබෙන තීරණය තුළින් තමන්ට අසාධාරණයක් සිදුවන බවයි.
ඒ තුළින් සිය මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබා දෙන ලෙස ඉල්ලා මෙම පෙත්සම් ඉදිරිපත් කර තිබුණා.
එමෙන්ම, මින් පෙර පිට වූ බව කියන ප්රශ්න තුන සඳහා සම්පූර්ණ ලකුණු ලබා දීමට ගෙන තිබෙන තීරණය බල රහිත කිරීමේ තීන්දුවක් ලබා දෙන ලෙසත් 5 වසර ශිෂ්යත්ව විභාගය යළි පවත්වන ලෙස නියෝගයක් නිකුත් කරන ලෙසත් පෙත්සම්කරුවන් වැඩිදුරටත් ශ්රේෂ්ඨාධිකරණයෙන් ඉල්ලා සිටියා.
මෙවැනි පසුබිමක මතභේදකාරී තත්වයකට මුහුණ දුන් මෙවර 5ශ්රේණියේ ශිෂ්යත්ව විභාගය යළි පැවැත්වීමේ අවශ්යතාවක් නොවන බව විභාග කොමසාරිස් ජනරාල් අමිත් ජයසුන්දර පසුගිය ඔක්තොම්බර් 14 වන දින ප්රකාශ කළා.
මතභේදයට තුඩු දී ඇති මෙවර 5 ශ්රේණිය ශිෂ්යත්ව විභාගය යළි පවත්වන්නේද ? නැද්ද ? යන්න තීරණය කිරීම සඳහා 07 දෙනෙකුගෙන් යුත් කමිටුවක් පත් කෙරුණු අතර, එම කමිටුවේ තීරණය අනුව මෙම තීරණය ගනු ලැබුවා.
