කොළඹ මහ නගර සභාවේ නගරාධිපතිවරිය ලෙස ව්‍රායි කැලී බල්තසාර් මීට සුළු මොහොතකට පෙර තේරී පත් වුණා.
ජාතික ජන බලවේගය නියෝජනය කරමින් ඉදිරිපත් වූ ව්‍රායි කැලී බල්තසාර් ඡන්ද 61ක් දිනා ගත් අතර, විපක්ෂය නියෝජනය කරමින් ඉදිරිපත් වූ රීසා සාරුක්ට ලබා ගැනීමට හැකිවූයේ ඡන්ද 54ක් පමණයි.
ඒ අනුව, කොළඹ මහ නගර සභාවේ නගරාධිපතිවරිය ලෙස ව්‍රායි කැලී බල්තසාර් වැඩි ඡන්ද 07 කින් තේරී පත් වුණා.
කොළඹ මහ නගර සභාවේ පළමු සභා වාරය අද (16) පෙරවරු 9ට ආරම්භ වුණා.
එහිදී නගරාධිපතිවරයා සඳහා වන ජාතික ජන බලවේගය නියෝජනය කරමින්, ව්‍රායි කැලී බල්තසාර්ගේ නම යෝජනා වූ අතර විපක්ෂය නියෝජනය කරමින් රීසා සාරුක්ගේ නම යෝජනා වුණා.
ඒ අනුව නගරාධිපතිවරයා තෝරා ගැනීම සඳහා ඡන්ද විමසීමක් කොළඹ නාගරික කොමසාරිස්වරිය විසින් යෝජනා කළ අතර ඊට ජාතික ජන බලවේගය විසින් රහස්‍ය ඡන්දයක් සහ සමගි ජන බලවේගය විසින් විවෘත ඡන්දයක් යෝජනා කළා.
කෙසේ නමුත් පවත්වන ඡන්දය රහස්‍ය ඡන්දයක් ද විවෘත ඡන්දයක් යන්න සඳහා සභාව තුළ උණුසුම් තත්ත්වයක් මතුව තිබෙනවා.
ඒ අනුව, අවසානයේ සියලුම දෙනා ඒකමතිකව රහස්‍ය ඡන්දයක් පැවැත්වීමට එකඟතාවය පල කළා.
