කිරිපිටි මත පනවා ඇති සියලු ආනයන බදු ඉවත් කිරීමට රජය තීරණය කර තිබේ.
කැබිනට් ප්‍රකාශක, අමාත්‍ය කෙහෙළිය රඹුක්වැල්ල මහතා පැවසුවේ, ඊයේ (09) පැවති කැබිනට් මණ්ඩලයේ දී එම තීරණය ගත් බවය.
කිරිපිටි මිල ඉහළ නැංවීමට ආනයනික සමාගම් අඛන්ඩව ඉල්ලීම් සිදුකළද, ඊට අවසර හිමි නොවූ අතර එබැවින් සිය ආනයන කටයුතු සීමා කිරීමට තීරණය කර ඇති බවයි කිරිපිටි ආනයනකරුවන්ගේ සංගමය නිවේදනය කළේ. එමෙන්ම, ආනයනකරුවන් සිය ආනයන කටයුතු සීමා කිරීම නිසා වෙළඳපොලේ කිරිපිටි හිඟයක් ද නිර්මාණය විය.
මතුව ඇති කිරිපිටි හිඟය පිළිබඳ කැබිනට් මණ්ඩලයේදී සාකච්ඡාවට ලක්ව ඇති අතර මෙහිදී මුදල් අමාත්‍ය බැසිල් රාජපක්ෂ මහතා විසින් කිරිපිටි හිඟයට විසඳුම් දෙකක් ඉදිරිපත් කර ඇත.
කිරිපිටි මිල වැඩි කිරිම හෝ පාරිභෝගිකයාට හා ව්‍යාපාරිකයාට හානියක්නොවන පරිදි දැනට අය කරන බදු කිහිපයක් අඩු කර කිරිපිටි මිල ස්ථාවරව පවත්වාගෙන යෑම යන විසඳුම් දෙක එහිදී ඔහු විසින් ඉදිරිපත් කර තිබේ. මෙහිදී අමාත්‍ය මණ්ඩලය විසින් අඩුකළ හැකි බදු අඩුකර කිරිපිටි මිල ස්ථාවර පවත්වාගෙන යෑමේ යෝජනාව අනුමත කර තිබේ.
