ඉදිරි සතිය තුළදී කැබිනට් සංශෝධනයක් සිදුකරමින් ප්‍රධාන අමාත්‍ය ධූර කිහිපයක වෙනස්කම් සිදුවීමට නියමිත බව ඩේලිමිරර් පුවත්පත වාර්තා කරනවා.
ඒ අනුව මේ වන විට දැඩි කතාබහකට ලක්ව තිබෙන සෞඛ්‍ය අමාත්‍යාංශය පවිත්‍රාදේවි වන්නිආරච්චි මහත්මියගෙන් ඉවත්කර එය වෛද්‍ය රමේෂ් පතිරණ මහතාට ලබාදීමට නියමිත බවත් පවිත්‍රා අමාත්‍යතුමියට බලශක්ති අමාත්‍යාංශය ලබාදීමට නියමිත බවත් පැවසෙනවා.
එමෙන්ම අධ්‍යාපනය, ජනමාධ්‍ය, විදේශ කටයුතු, වැවිලි කර්මාන්ත යන විෂයන්හීද අමාත්‍ය ධූර සංශෝධනයක් සිදුවීමට නියමිත බවයි වාර්තා වන්නේ.
ඒ අනුව අමාත්‍ය කෙහෙළිය රඹුක්වැල්ල මහතා වෙනුවට ජනමාධ්‍ය අමාත්‍යාංශය සඳහා අමාත්‍ය ඩලස් අලහප්පෙරුම මහතා පත්කිරීමට නියමිත අතර කෙහෙළිය රඹුක්වැල්ල මහතාට වැවිලි කර්මාන්ත අමාත්‍යාංශය ලබාදීමට නියමිතයි.
කෙසේ වෙතත් ඩලස් අලහප්පෙරුම මහතා ජනමාධ්‍ය අමාත්‍යාංශය භාරගැනීමට සිය අකමැත්ත පලකර ඇති බවටද තොරතුරු වාර්තා වනවා.
තවත් ආන්දෝලනාත්මක අමාත්‍යාංශයක් වන අධ්‍යාපන අමාත්‍යාංශය මහාචාර්ය ජී.ඇල්.පීරිස් මහතාගෙන් ඉවත්කොට එය ප්‍රසන්න රණතුංග මහතාට ලබාදී ජී.ඇල්.පීරිස් මහතා විදේශ කටයුතු අමාත්‍යවරයා ලෙස පත්කෙරෙනු ඇති.
කෙසේ වෙතත් මෙම සංශෝධනයන් පිළිබදව මේ වන විටත් සාකච්ඡා මට්ටමේ පවතින අතර ඒ සඳහා අවසන් තීරණයක් ගෙන නොමැති බවයි වාර්තා වන්නේ.
