නාසි හමුදා සෙබළෙකු රුසියාවට එරෙහි ව සටන් වැදි යුද විරුවකු ලෙස හඳුන්වා දුන් කැනඩා කථානායක ඇන්තනී රොටා පසුගිය අඟහරුවාදා (26) ධුරයෙන් ඉල්ලා අස් වී තිබෙන බව විදෙස් මාධ්‍ය වාර්තා කරනවා.
පසුගිය 22 වන දින කැනඩාවට පැමිණි යුක්රේන ජනාධිපති ව්ලොදිමීර් සෙලේන්ස්කී, රුසියන් ආක්‍රමණය හමුවේ, කැනඩාව යුක්රේනයට සහාය ලබා දීම සම්බන්ධයෙන් ස්තූතිය පළ කරමින් කැනඩාවේ පාර්ලිමේන්තුව ආමන්ත්‍රණය කර තිබුණා.
එම අවස්ථාවේදී දෙවැනි ලෝක යුද්ධයේ දී රුසියන් හමුදාවට එරෙහිව සටන් වැදුණු රණ විරුවකු බව පෙන්වා දෙමින්, 98 හැවිරිදි යර්ලොස්ලේව් හුන්කා නමැති අයෙක් කැනඩාවේ නියෝජ්‍ය මන්ත්‍රී මණ්ඩල කතා නායක ඇන්තනි රෝටා විසින් පාර්ලිමේන්තුව වෙත කැඳවා තිබෙනවා.
එහිදී යුක්රේන රණ විරුවකු යැයි පවසමින් එම පුද්ගලයා වෙනුවෙන් ගුණ කථනයක් ද සිදුවුණු අතර, කතා නායකවරයා, කැනඩා අග්‍රාමාත්‍ය ටෲඩෝ ඇතුළු සෙසු මැති ඇමැතිවරුන් මෙන්ම පාර්ලිමේන්තුවේ සිටි යුක්රේන ජනාධිපතිවරයාද අසුන්වලින් නැගිට ඔහුට ගෞරව දක්වා තිබුණා.
කෙසේ නමුත්, එම සිද්ධියෙන් දින කීපයක් ගත වීමෙන් අනතුරුව යර්ලොස්ලේව් හුන්කා නමැති එම පුද්ගලයා ස්වේච්ඡාවෙන් හිට්ලර්ගේ නාසි හමුදාවට සම්බන්ධ වී සිටි වාර්ගින යුක්රේන වැසියකු බව අනාවරණය වී ඇති බව විදෙස් මාධ්‍ය පවසනවා.
මෙම සිදුවීම සම්බන්ධයෙන් කැනේඩියානු අගමැති ජස්ටින් ටෘෘඩෝ එරට පාර්ලිමේන්තුවෙන්, යුක්රේන ජනාපධිතිවරයාගෙන් පමණක් නොව ලොව සමස්ත යුදෙව් වැසියන්ගෙන්ද සමාව ඉල්ලා තිබෙනවා.
අගමැති ටෘෘඩෝ පවසා ඇත්තේ, නාසි සෙබළෙකුට එලෙස ගෞරව දැක්වීම පාර්ලිමේන්තුවට සහ කැනඩා රජයට සිදු වුණු ලැජ්ජා සහගත සිදුවීමක් බවයි.
