මේ වන විට නවතා දමා ඇති වාහන ආනයනය කිරීමේ ක්‍රියාවලිය නැවත ආරම්භ කල හැකි ආකාරය පිළිබදව කරුණු ඇතුළත් සංදේශයක් කෙටි කලක් තුළ රජයට භාර දෙන බව ශ්‍රී ලංකා මහ බැංකුව නිවේදනය කරනවා.
මහබැංකු අධිපති අජිත් නිවාඩ් කබ්රාල් මහතා පවසන්නේ වාහන ආනයන නැවත ආරම්භ කිරීම පිළිබඳව යෝජනා කිහිපයක් මෙමගින් රජයට ඉදිරිපත් කර ඇති බවයි.
තමන්ගේම විදේශ විනිමය ඉපැයීම්, විශේෂයෙන් විදේශයන්හි රැකියාවල නියුක්ත වූවන් විසින් උපය මුදල්වලින් ගෙවීම් භාවිතා කරමින් වාහන ආනයනය කිරීම් සදහා වන යෝජනා මේ සදහා ඉදිරිපත් කර ඇති බවයි කබ්රාල් මහතා පවසන්නේ.
මෙම කරුණු අනුව කටයුතු කළහොත් මෙරටට විදේශ විනිමය ගලා ඒම, රජයට ආදායම් එකතු කිරීම මෙන්ම වාහන වෙළඳපොලේ සෞඛ්‍ය සම්පන්න නොවන බුබුලක් මතු වීම වැලැක්වීම වැනි කරුණු ඉටුකර ගත හැකි බවයි කබ්රාල් මහතා පෙන්වා දෙන්නේ.
පවත්නා කොවිඩ් වසංගත තත්ත්වය මධ්‍යයේ හිඟ විදේශ විනිමය සංචිත සංරක්‍ෂා කිරීමේ පියවරක් ලෙස වසර එකහමාරකට වැඩි කාලයක් පුරා වාහන ආනයනය කිරීම අත්හිටුවා තිබෙනවා.
කෙසේ වෙතත් රජය සදහන් කරන්නේ වාහන තදබදය අවම කිරීම, වාහන සංඛ්‍යාව අඩු කිරීම, පරිසර දූෂණය සහ ඉන්ධන ආනයනය කිරීමේ අරමුණින් මෙම තහනම පනවා ඇති බවයි.
