2025 අයවැය මඟින් ඉදිරිපත් කර ඇති යෝජනා ලංකා වාණිජ මණ්ඩලයෙහි නිර්දේශ, ශ්‍රී ලංකා ආර්ථික සමුළුවේ සිදු කළ සාකච්ඡා සහ ‘2030 Vision’ ප්‍රතිපත්ති ප්‍රකාශනය සමඟ අනුකූල වන බව ලංකා වාණිජ මණ්ඩලය පෙන්වා දෙනවා.
එම මණ්ඩලය සඳහන් කරන්නේ, 2025 අයවැය ස්ථාවරත්වය, පාලනය, මහජන සහන ලබා දීම, දූෂණය මැඩපැවැත්වීම සහ සියලු දෙනා ඇතුළත් වර්ධනයක් ඇති කිරීම කෙරෙහි අවධානය යොමු කිරීම අරමුණු කරගෙන ඇති බවයි.
මෙවර අයවැය මඟින් වඩාත් අවධාරණයට ලක් කරන ලද රාජ්‍ය-පෞද්ගලික හවුල්කාරිත්වය මඟින් යටිතල පහසුකම් පුළුල් කිරීම සහ ඩිජිටල් ආර්ථිකය දියුණු කිරීම වෙනුවෙන් වෙන්වූ යෝජනා පරිවර්තන ක්‍රියාවලියට ශක්තිමත් පදනමක් සපයනු ඇති බවද ලංකා වාණිජ මණ්ඩලය පවසනවා.
රේගු පනත ප්‍රතිසංස්කරණය කිරීමේ අවශ්‍යතාවය සහ ජාතික තනි කවුළුව ව්‍යාපෘතිය (රටවල් අතර සිදු කරන වෙළෙඳ කටයුතුවලදී නියාමන අධිකාරීන් වෙත ඉදිරිපත් කළ යුතු ලේඛන හා දත්ත ඉදිරිපත් කිරීම සඳහා එක් ස්ථානයක්) ක්‍රියාත්මක කිරීමට රජය විසින් ඉදිරිපත් කර ඇති යෝජනා වාණිජ මණ්ඩලයේ පැසසුමට ලක්ව ඇති අතර ඔවුන් අවධාරණය කර ඇත්තේ, එම යෝජනා වෙළඳ පහසුකම් වැඩි දියුණු කිරීම සහ ව්‍යාපාර කිරීමේ පහසුව වර්ධනය කිරීම සඳහා ඉතා වැදගත් වන බවයි.
