ජාත්‍යන්තර ක්‍රිකට් කවුන්සිලය (ICC) විසින් නිකුත් කර ඇති නවතම ශ්‍රේණිගත කිරීම්වලට අනුව ශ්‍රී ලංකා කාන්තා ක්‍රිකට් කණ්ඩායමේ නායිකා චමරි අතපත්තු ICC කාන්තා T20I පිතිකරණ ශ්‍රේණිගත කිරීම් ලැයිස්තුවේ ඉදිරියට පැමිණ තිබෙනවා.
එමෙන්ම, ශ්‍රී ලංකා කණ්ඩායමේ ක්‍රීඩිකා හර්ෂිතා සමරවික්‍රම එම ලැයිස්තුවේ පළමු 20 දෙනා අතර ස්ථානයක් නැවතත් හිමි කර ගැනීමට සමත්ව තිබෙනවා.
පසුගිය සතියේ දඹුල්ලේදී පැවැති ආසියානු කුසලාන කාන්තා ක්‍රිකට් තරගාවලියේදී ශ්‍රී ලංකාවේ වමත් ආරම්භක පිතිකාරිනියන් වන චමරි අතපත්තු සහ ඉන්දියාවේ ස්ම්‍රිති මන්දනා දැක්වූ දක්ෂතා අනුව ඔවුන් ICC කාන්තා T20I පිතිකරණ ශ්‍රේණිගත කිරීම්වල ඉදිරියට පැමිණ තිබුණා.
චමරි අතපත්තු බංග්ලාදේශයට එරෙහිව නොදැවී ලකුණු 49ක්, අවසන් පූර්ව තරගයේදී පාකිස්තානයට එරෙහිව ලකුණු 63ක් සහ ඉන්දියාවට එරෙහිව අවසන් මහා තරගයේදී ලකුණු 43කින් ලකුණු 61ක් වශයෙන් රැස්කරමින් එම ලැයිස්තුවේ 6 වෙනි ස්ථානයට පත්ව තිබෙනවා.
ස්ම්‍රිතී මන්දනා අවසන් පූර්ව තරගයේදී බංග්ලාදේශයට එරෙහිව නොදැවී ලකුණු 55ක් සහ අවසන් තරගයේදී ශ්‍රී ලංකාවට එරෙහිව ලකුණු 60ක් ලබා ගනිමින් සිවුවැනි ස්ථානය දක්වා එක් ස්ථානයක් ඉදිරියට පැමිණ ඇති බව සඳහන්.
බංගලාදේශ නායිකා නිගාර් සුල්තානා ස්ථාන තුනක් ඉදිරියට පැමිණ 14 වැනි ස්ථානයටත්, ඉන්දියාවේ ජෙමිමා රොද්‍රිගස් එක් ස්ථානයක් ඉදිරියට පැමිණ 18 වැනි ස්ථානයටත් පත්ව තිබෙනවා.
එමෙන්ම, ආසියානු කුසලාන අවසන් මහා තරගයේදී නොදැවී ලකුණු 69ක් ලබා ගනිමින් තරගයේ වීරවරිය බවට පත් වූ ශ්‍රී ලංකාවේ හර්ෂිතා සමරවික්‍රම නැවතත් පළමු 20 දෙනා අතරට පැමිණ තිබෙනවා.
