එක්සත් ජනපදය සමඟ වැඩෙන තරඟකාරිත්වය මධ්‍යයේ කලාපීය ආරක්ෂක සබඳතා ගැඹුරු කිරීමට උත්සාහ කරන චීනය, කාම්බෝජ හමුදා සමඟ අවබෝධතා ගිවිසුමකට අත්සන් තබා ඇතැයි වාර්තා වේ.
රටවල් දෙකෙහි ගොඩබිම් හමුදාවේ ජ්‍යෙෂ්ඨ අණදෙන නිලධාරීන් බ්‍රහස්පතින්දා මාර්ගගත ක්‍රමවේද ඔස්සේ ගිවිසුමට අත්සන් තැබූ බව චීන ආරක්ෂක අමාත්‍යාංශයේ ප්‍රකාශක ජ්‍යෙෂ්ඨ කර්නල් වූ ක්වාන් බීජිං හි පැවති ප්‍රවෘත්ති සාකච්ඡාවක දී පැවසීය.
කෙසේවෙතත් ගිවිසුම පිළිබඳ තොරතුරු කිසිවක් හෙළි නොකිරීමට ඔහු පරිස්සම් වූ බව විදෙස් වාර්තා පවසයි.
මහජන විමුක්ති හමුදා ගොඩබිම් බලකායේ අණදෙන නිලධාරී ජෙනරාල් ලියු ෂෙන්ලි සහ රාජකීය කාම්බෝජ හමුදාවේ නියෝජ්‍ය ප්‍රධානී ජෙනරාල් හන් මැනට් විසින් ගිවිසුමට අත්සන් කරන ලදී.
චීනය සිය යුධ නැව්වලට ඕස්ට්‍රේලියානු වෙරළේ සිට කිලෝමීටර් 2,000ක් (සැතපුම් 1,200) පමණ දුරින් පිහිටි සොලමන් දූපත් සමඟ ද පසුගිය දා ආරක්ෂක ගිවිසුමක් අත්සන් කිරීමට නියමිත බව විදෙස් වාර්තා සදහන් කරයි.
