ලෝකයේ රටවල් ගණනාවක විශාල ජන පිරිසකට බලපෑම් කළ හැකි ඔවුන්ගේ පුද්ගලික දත්ත විශාල ප්‍රමාණයක් මේ වනවිට චීනය සතුව ඇති බව ඇමරිකාවේ හිටපු නියෝජ්‍ය ආරක්ෂක උපදේශකවරයා අනාවරණය කර තිබේ.
ට්‍රම්ප් පාලනය යටතේ ඇමරිකාවේ නියෝජ්‍ය ආරක්ෂක උපදේශකවරයා ලෙස කටයුතු කළ මැතිව් ෆොටින්ගර් මේ තොරතුරු අනාවරණය කර ඇත්තේ ඇමරිකානු සෙනට් මණ්ඩලයේ බුද්ධි අංශ කමිටුව හමුවේදීය.
අදාළ කමිටුව හමුවේ පැවති විමර්ශනයකදී ඔහු සදහන් කර ඇත්තේ සෑම ඇමරිකානුවකු පිළිබදව විශේෂ තොරතුරු ගොනුවක් සම්පාදනය කළ හැකි තරම් දත්ත චීනය සතුව ඇති බවයි.
ෆයිව්ජී තාක්ෂණය, විවිධ දුරකතන සබදතා සහ ඊට අදාළ තාක්ෂණික උපකරණ ඔස්සේ මෙම පෞද්ගලික දත්ත එක්රැස් කරගෙන ඇති බව ද ඔහු සදහන් කළේය.
මෙම දත්ත යොදාගෙන ප්‍රබල පුද්ගලයන් රැසකගේ අතිශය වැදගත් පෞද්ගලික තොරතුරු හෙළිදරව් කර ඔවුන් අපහසුතාවයට පත් කිරීමටත්, ඔවුන්ගේ කටයුතු අනාවරණය කිරීමටත් හැකියාව ඇති බව ද මැතිව් ෆොටින්ගර් හෙළිදරව් කර ඇත.
