චීනයේ යුධමය ක්‍රියාකාරකම් හේතුවෙන් ගෝලීය වෙළද කටයුතු සහ නාවික කටයුතු සදහා බාධා එල්ල වෙමින් ඇතැයි විදෙස් මාධ්‍ය පවසයි.
තායිවානයට එරෙහිව චීනය ආරම්භ කළ යුද අභයාසය මේවනවිට අවසන් වී තිබේ.
එහෙත් තායිවාන සමුදා සන්ධියේ සහ අවට මුහුදු ප්‍රදේශවල නිරන්තරයෙන් සිය හමුදා පුහුණු කටයුතු සිදු කරන බව චීනය පවසයි.
එමෙන්ම තායිවාන සමුදා සන්ධියේ සිදුවන වෙනස්කම් සම්බන්ධයෙන් විමසිල්ලෙන් පසුවන බවත් එම කලාපය තුළ නාවික මුර සංචාර සිදු කරන බවත් චීනය පවසයි.
ගෝලීය වෙළද හා නාවික කටයුතු සදහා භාවිත කරන මුහුදු සීමාවක්, චීනය සිය යුද පුහුණු කටයුතු සදහා භාවිත කිරීම සාමාන්‍ය තත්ත්වයක් වුවහොත් එය අර්බුද රැසක ආරම්භය වනු ඇතැයි ජාත්‍යන්තර විශ්ලේෂකයින් පවසයි.
චීනය නිසා ඇතිවන මතභේදාත්මක තත්ත්වයන් ජාතයන්තර වෙළදාමට බරපතල අභියෝග එල්ල කරනු ඇතැයි ද ඔවුන් පෙන්වා දෙයි.
එවැනි තත්ත්වයක් ඇතිවුවහොත් නැව් හිමි සමාගම් තායිවාන සමුදා සන්ධිය වෙනුවට විකල්ප මුහුදු මාර්ග සොයාගැනීමට පෙළඹීමෙන් ගෝලීය වශයෙන් භාණ්ඩ හා සේවා මිළ ඉහල යාමේ අවදානමක් පවතින බව ද ජාතයන්තර විශ්ලේෂකයින් පෙන්වා දෙයි.
