චීනය සිය ශුන්‍ය කොවිඩ් ප්‍රතිපත්තිය ආරම්භ කළේ පුළුල් ලෙස අගුලු දැමීම් සහ නිරෝධායන සමඟ කොවිඩ් පැතිරීම මැඩපැවැත්වීමේ අරමුණින් වුවද, එය රටේ ආර්ථික වර්ධනය මන්දගාමී වීමට හේතු වී ඇති බව එරට වාර්තා පවසයි.
2020 වර්ෂයේ කොවිඩ් වසංගතයේ මුල් අවධියට එරෙහිව සටන් කිරීම සඳහා චීනය සැළකිය යුතු ලෙස වෙළඳපොළ වසා දැමූ අතර ඒ හේතුවෙන් වසර 28 කට පසු එහි ආර්ථිකය පළමු වරට හැකිලුණු බව නිව්යෝර්ක් ටයිම්ස් පුවත්පත වාර්තා කර තිබේ.
ඒ හේතුවෙන් විරැකියාව ඉහළ ගොස්, වෙළෙඳපොළ සහ කුඩා ව්‍යාපාර තවමත් අඩපණව ඇති බව ද පැවසේ.
හාවඩ් විශ්වවිද්‍යාලයේ ආර්ථික විද්‍යාව පිළිබඳ මහාචාර්යවරයකු සහ ජාත්‍යන්තර මූල්‍ය අරමුදලේ හිටපු ප්‍රධාන ආර්ථික විද්‍යාඥයකු වන කෙනත් රොගොෆ් පැවසුවේ චීනය යනු ගෝලීය ආර්ථිකය තුළ කිසිදා නොවැටුණු රාජ්‍යක් බවයි.
චීනයේ මන්දගාමී වර්ධනය දැනටමත් බිඳ වැටෙමින් පවතින ගෝලීය ආර්ථිකය සංකීර්ණ කර ඇති බව ද ඔහු පවසා තිබේ.
උද්ධමනය වැඩිවීම එක්සත් ජනපදයේ අවපාතයේ අවදානම ඉහළ නංවා ඇති අතර, යුක්රේනයේ රුසියානු යුධ මෙහෙයුම බලශක්ති මිල ඉහල දමා යුරෝපය පුරා සැපයුම් දාම කඩාකප්පල් කර ඇත.
