චීනයෙන් ආනයනය කරන කාබනික පොහොරවල කිසිඳු හානිකර ක්ෂුද්‍ර ජීවීන් කොට්ඨාශයක් නොමැති බව කෘෂිකර්ම අමාත්‍ය මහින්දානන්ද අලුත්ගමගේ මහතා පවසනවා.
ඒ මහතා මේ බව සඳහන් කර සිටියේ එළඹෙන මහ කන්නය සඳහා ආනයනය නියමිත කාබනික පොහොරවලට අදාළ සාම්පලවල තිබී මෙරට බෝග වගාවන්ට අහිතකර ක්ෂුද්‍ර ජීවි වර්ගයක් සොයාගෙන ඇති බවට සමස්ත ලංකා ගොවිජන සම්මේලනයේ සභාපති නාමල් කරුණාරත්න මහතා සිදුකළ ප්‍රකාශයට පිළිතුරු දෙමින්.
තරගකරුවන් විසි ගණනක් අතුරින් එක් සමාගමක් තෝරාගත් අතර එම චීන සමාගම දැනට ලෝකයේ වැඩිම කාබනික පොහොර නිෂ්පාදනය කරන සමාගම බවත් ප්‍රමිති ආයතනය හඳුන්වා දුන් පරීක්ෂණාගාරයේදී කළ නිරීක්ෂණ අනුව මේ ආනයනය කරන පොහොරවල කිසිදු ක්ෂුද්‍ර ජීවීයෙක් නොමැති බව පැහැදිලිව සඳහන් කර ඇති බවත් අමාත්‍යවරයා පවසනවා.
කෙසේ නමුත් නිල නොවන අයුරින් අවිධිමත්ව ගෙන්වා ගත් සාම්පලයක යම් ක්ෂුද්‍ර ජීවීයෙක් සිටි බවත් එම ක්ෂුද්‍ර ජීවියා ඇතැම් භෝග වලට අහිතකර බැවින් එවැනි පොහොර ආනයනය නොකරන බවත් එහිදී අමාත්‍යවරයා අවධාරණය කර සිටියා.
නමුත් රෝහිණී කවිරත්න මන්ත්‍රීවරිය පවසන පරිදි චීනයේ වැසිකිළි වල කැළිකසල, අසූචි මෙරටට ගෙන්වා ගැනීමක් නොකරන බවත් එම පොහොර නිෂ්පාදනය කර ඇත්තේ මුහුදු පැළෑටි වලින් බවත් මහින්දානන්ද අලුත්ගමගේ මහතා වැඩිදුරටත් පවසනවා.
