ශ්‍රී ලංකාවට කාබනික පොහොර ගෙන ආ චීන සමාගම වන සිවින් බයොටෙක් සමූහය ශ්‍රී ලංකාවේ ජාතික ශාක නිරෝධායන සේවාවේ නියෝජ්‍ය අධ්‍යක්ෂවරයාගෙන් ඩොලර් මිලියන 8ක වන්දි ඉල්ලමින් එන්තරවාසි යොමුකර තිබෙනවා.
තම සමාගමේ පොහොර තොගයේ අහිතකර බැක්ටිරියා ඇති බවට ව්‍යාජ වාර්තා නිකුත් කිරීම මගින් සමාගමට මූල්‍යමය පාඩුවක් හා කීර්තිනායමට හානියක් සිදුව ඇති බවට අදාල එන්තරවාසියේ සදහන්.
තම සමාගමට සිදුවූ මෙම හානිය හේතුවෙන් නොවැම්බර 5 දා සිට දින 3ක් ඇතුළත ඩොලර් මිලියන 8 ක වන්දිය ගෙවන ලෙස සඳහන් කරමින් ශාක නිරෝධායන සේවාවේ නියෝජ්‍ය අධ්‍යක්ෂ ආචාරය ඩබ්.ඒ.ආර්.ටි. වික්‍රමාරච්චි මහතා වෙත මෙම එන්තරවාසිය යොමුකර තිබෙනවා.
සමාගම සිය එන්තරවාසියෙන් වැඩිදුරටත් පවසන්නේ සෙල්සියස් අංශක 600ක උෂ්ණත්වයක් යටතේ ජීවානුහරණය කරන ලද සිය පොහොර තුළ එර්වේනියා නැමැති බැක්ටීරියාව අඩංගු විය නොහැකි බවයි.
