කැසට් ගසන ආකාරයට ගැසට් ගසන ආණ්ඩුව විසින් පත්තර අච්චු ගසන ආකාරයට මුදල් අච්චු ගසමින්ද සිටින බව සමගි ජන බලවේගයේ පාර්ලිමේන්තු මන්ත්‍රී නලින් බණ්ඩාර මහතා පවසනවා.
එහි ප්‍රතිඵලයක් ලෙසට අත්‍යාවශ්‍ය භාණ්ඩ ගණනාවක මිල ඉහළ ගොස් ඇති බවයි ඔහු පවසන්නේ.
එමෙන්ම, එලැඹෙන කන්නයේ වගා කටයුතු සිදු කරන්නේදැයි ගොවීන් දෙගිඩියාවෙන් සිටින බවත් රජය ආනායනය කර ඇත්තේ වගාව ආරම්භයේ යෙදිය යුතු පොහොර නොව අතර මැදදී යෙදිය යුතු පොහොර බවත් ඔහු පවසනවා.
පසුගියදා ශාක නිරෝධායන මධ්‍යස්ථානයෙන් ප්‍රතික්ෂේප කරන ලද චීන පොහොර නැවත රටට ගෙන ඒමේ සූදානමක් තිබෙන අතර දැනටමත් එම පොහොර නැව සිංගප්පුරුවේ සිට මෙරට බල පැමිණෙමින් තිබෙන බවත් චීන බලපෑමට යටත්ව එය ගොඩබෑමේ සැලැස්මක් තිබෙන බවත් පාර්ලිමේන්තු මන්ත්‍රී නලින් බණ්ඩාර මහතා පවසනවා.
එම කසල පොහොර මෙරට ගොවි බිම්වලට දැමීමට ඉඩ නොදෙන ලෙස ගොවියන්ට බලකර සිටින බවත් එම කසල පොහොර මෙරටට ඇතුල්කිරීම වැලැක්වීම සඳහා කළ යුතු කැපකිරීමද කරන බවත් මන්ත්‍රීවරයා අවධාරණය කර සිටිනවා.
