අපරාධ පරීක්ෂණ දෙපාර්තමේන්තුවේ නිලධාරින් කණ්ඩායමක් කොළඹ හුණුපිටිය හරස් පාරේ පිහිටි ලංකාදීප ප්‍රධාන කාර්යාලයට අද (28) පෙරවරුවේ පැමිණි බව එහි සේවකයින් පවසනවා.
ඒ, පාරිභෝගික කටයුතු පිළිබඳ අධිකාරියේ හිටපු විධායක අධ්‍යක්ෂ තුෂාන් ගුණවර්ධන මහතා ලංකාදීප පුවත්පතට කළ ප්‍රකාශ සම්බන්ධයෙන් එහි ප්‍රධාන කර්තෘවරයාගෙන් සහ ලිපිය සම්පාදනය කළ මාධ්‍යවේදීන්ගෙන් ප්‍රශ්න කිරීමට බවයි වාර්තා වන්නේ.
කෙසේ වෙතත් ලංකාදීප පුවත්පතේ ප්‍රධාන කතෘ සිරි රණසිංහ මහතා අදාළ නිලධාරීන්ට දැනුම්දී ඇත්තේ මෙම කරුණ සම්බන්ධයෙන් තමන් පිළිතුරු දීමට සූදානමක් නොමැති බවයි.
ඒ අනුව ප්‍රකාශ සටහන් කර ගැනීම සඳහා වෙනත් දිනයක නැවතත් පැමිණෙන බවට දැනුම්දීමෙන් අනතුරුව අපරාධ පරීක්ෂණ දෙපාර්තමේන්තුවේ නිලධාරින් එම ස්ථානයෙන් පිටව ගොස් තිබෙනවා.
කෙසේ වෙතත් අද (28) උදෑසන පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවේදී ජනමාධ්‍ය අමාත්‍ය ඩලස් අලහප්පෙරුම මහතා සඳහන් කළේ මෙම කරුණ සම්බන්ධයෙන් මාධ්‍යවේදීන්ව අපරාධ පරීක්ෂණ දෙපාර්තමේන්තුවට කැඳවීම පිළිබදව රජය කණගාටුවට පත්වන බවයි.
ඒ සම්බන්ධයෙන් අපරාධ පරීක්ෂණ දෙපාර්තමේන්තුව කිසිදු ආකාරයකින් මාධ්‍යවේදීන්ගෙන් ප්‍රශ්න කිරීමක් සිදු නොකරන බවටත් මෙම කරුණ පිළිබදව අග්‍රාමාත්‍ය මහින්ද රාජපක්ෂ මහතාද මැදිහත්වී ඇතිබවත් අමාත්‍යවරයා සඳහන් කළා.
කෙසේ වෙතත් එවන් පසුබිමක අපරාධ පරීක්ෂණ දෙපාර්තමේන්තුවේ නිලධාරීන් ලංකාදීප පුවත්පත් මාධ්‍යවේදීන්ව ප්‍රශ්න කිරීමට එම කාර්යාලයට යෑම විශේෂත්වයක්.
