27 C
Colombo
Saturday, December 2, 2023

වන අලි ජාවාරමක් සම්බන්දයෙන් යුද හමුදාව හා වනජීවි නිලධාරීන් අතර ගැටුමක්

- Advertisement -

මින්නේරිය ජාතික වනෝද්‍යානයේ කොටසක නීතිවිරෝධී ලෙස අලි පැටවෙකු ඇල්ලීමේ මෙහෙයුමක් ක්‍රියාත්මක වන බවට වනජීවි සංරක්ෂණ දෙපාර්තමේන්තු නිලධාරීන්ට ලැබුණු තොරතුරක් මත යුද හමුදා වාහන දෙකක් නැවැත්වීමට උත්සාහ කිරීමත් සමග ඇති වූ පහරදීමක් සම්බන්ධයෙන් හබරණ පොලිසියට අද (26) පැමිණිල්ලක් ඉදිරිපත් වී තිබේ.
මේ සම්බන්ධයෙන් කළ විමසීමකදී හබරණ පොලිසියේ ස්ථානාධිපති ප්‍රධාන පොලිස් පරීක්ෂක එම්.කේ. ජයලත් පැවසුවේ වනජීවී සංරක්ෂණ දෙපාර්තමේන්තුව පාර්ශ්වයෙන් මෙන්ම යුද හමුදාව පාර්ශ්වයෙන් ද පැමිණිලි ලැබී ඇති බවයි.

නම් දැරූ කුප්‍රකට පුද්ගලයෙක්

අලි පැටවුන් ඇල්ලීම සම්බන්ධයෙන් අධිකරණයේ නඩු පවරා තිබූ කුප්‍රකට පුද්ගලයෙකු මින්නේරිය වනෝද්‍යානය අසල ස්ථානයක රැඳී සිටින බවත්, ඔහු සමග කණ්ඩායමක් වනෝද්‍යානය තුළට නිතර යන-එන බවටත් වනජීවී සංරක්ෂණ දෙපාර්තමේන්තුවට තොරතුරක් ලැබී ඇත. මේ සම්බන්ධයෙන් ක්‍රියාත්මක වූ වනජීවී නිලධාරීන් වනෝද්‍යානයෙන් පිටවීමට ඇති ස්ථාන රැසක මුර කපොලු ඇති කර, පරීක්ෂා කිරීම කර තිබේ.

යුද හමුදා වාහන දෙකක්

මේ අවස්ථාවේදී වනෝද්‍යානයේ සිට පැමිණි වාහන දෙකක් මුර කපොලුවල නතර කිරීමේ සංඥා නොතකා වේගයෙන් ධාවනය කර ඇති බවත්, එම වාහන දෙක අනුරාධපුරයේ පිහිටි යුද හමුදාවේ 21 වැනි බලසේනා මූලස්ථානය වෙත ගොස් ඇති බවත් විශ්වාස කටයුතු ආරංචි මාර්ග සඳහන් කරයි. වනජීවී සංරක්ෂණ දෙපාර්තමේන්තු නිලධාරීන් යුද හමුදාවේ අංක සහිත මේ වාහන දෙක පසුපස හඹාගොස් ඇති අතර, ඔවුන් ඉහළ නිලධාරීන්ගේ උපදෙස් නොලැබීම නිසා බලසේනා මූලස්ථානය වෙත ඇතුළු නොවී ආපසු පැමිණ ඇත.

දෙපාර්ශ්වයෙන්ම පැමිණිලි

ඉන්පසු යුද හමුදාවේ වාහන කිහිපයක් අදාළ වනජීවී දෙපාර්තමේන්තු නිලධාරීන් පසුපස පැමිණ ඇති අතර, හබරණ ප්‍රදේශයේදී ඔවුන් අතර වාදයක් ඇති වී තිබේ. එහිදී යුද හමුදාවේ නිලධාරියෙකු විසින් වනජීවී නිලධාරියෙකුට පහර දීමක් සිදු කර, තර්ජනය කර ඇති බවත්, පොලිසිය පැමිණ අදාළ ගැටළුව සමථයකට පත්කිරීමට උත්සාහ දරා ඇති බවත් අදාළ ආරංචි මාර්ග සඳහන් කරයි. ඉන්පසු දෙපාර්ශ්වයම හබරණ පොලිසියට පැමිණිලි දෙකක් ඉදිරිපත් කර තිබේ.

කීර්තිනාමයට ප්‍රශ්නයක් – හමුදාව

මේ සම්බන්ධයෙන් අප කළ විමසීමකදී යුද හමුදා මාධ්‍ය ප්‍රකාශක බ්‍රිගේඩියර් නිලන්ත ප්‍රේමරත්න පැවසුවේ අනුරාධපුර 21 වැනි බලසේනා මූලස්ථානයේ ප්‍රධානී මේජර් ජෙනරාල් මොහාන් රත්නායක හබරණ දෙස සිට අනුරාධපුරය දෙසට යමින් සිටියදී, වාහන දෙකක් පසුපසින් පැමිණ ඇති බවයි. මේජර් ජෙනරාල්වරයාගේ මෝටර් රථය සහ ආරක්ෂක රථය හමුදා කඳවුර තුළට ඇතුළු කිරීමෙන් පසු, පසුපසින් පැමිණි පිරිස අදාළ වාහනයේ අලි පැටවෙකු සිටින බවට කඳවුරු ගේට්ටුවේ සිටි හමුදා සෙබළුන්ට පවසා නික්ම ගොස් ඇති බවත්, තමන්ගේ කීර්තිනාමයට මෙසේ හානි කිරීම සම්බන්ධයෙන් මේජර් ජෙනරාල්වරයා හබරණ පොලිසියට පැමිණිල්ලක් කර ඇති බවත් බ්‍රිගේඩියර්වරයා සඳහන් කළේය. එහිදී කිසිදු පහරදීමක් සිදු වී නැතැයි ද අප කළ විමසීමේදී ඔහු පැවසීය.

විමර්ශනයක් කරනවා – වනජීවී අධ්‍යක්ෂ ජනරාල්

සිදුවීම සම්බන්ධයෙන් වනජීවී සංරක්ෂණ දෙපාර්තමේන්තුවේ අධ්‍යක්ෂ ජනරාල් චන්දන සූරියබණ්ඩාරගෙන් විමසීමේදී ඔහු සඳහන් කළේ යම් සිදුවීමක් සිදුවී ඇති බවයි. ඒ සම්බන්ධයෙන් මේ වන විට දෙපාර්තමේන්තුවේ පොළොන්නරුව සහකාර අධ්‍යක්ෂවරයාගේ මූලිකත්වයෙන් විමර්ශනයක් පවත්වන බව ද සඳහන් කළ අධ්‍යක්ෂ ජනරාල්වරයා, විමර්ශන වාර්තාව ලැබෙන තුරු තමන්ට ඊට වඩා කිසිවක් පැවසිය නොහැකි බව ද පැවසීය.
අදාළ සහකාර අධ්‍යක්ෂ ඩබ්ලිව්.එන්.කේ.එස්. චන්ද්‍රරත්න සම්බන්ධ කර ගැනීමට අප අවස්ථා ගණනාවකදී උත්සාහ කළද, ඔහු දුරකතනයට ප්‍රතිචාර දැක්වූයේ නැත.

පහර කෑවේ කවුද?

වාර්තා වන ආකාරයට මේ සිදුවීමේදී පහරකෑමට ලක්වී ඇත්තේ වනජීවී සංරක්ෂණ දෙපාර්තමේන්තුවේ මෑතකදී දැඩි කතාබහට ලක්වූ නිලධාරියෙකි. සෝමාවතිය වනෝද්‍යානයට නීතිවිරෝධී ලෙස ගවයන් ඇතුළු කිරීමට එරෙහිව, වනජීවී විෂය භාර රාජ්‍ය ඇමැති විමලවීර දිසානායක සහ දෙපාර්තමේන්තුවේ නිලධාරීන් අතර වාදයක් ඇතිවීම ඊට හේතුවයි. මෙහිදී ඇමැතිවරයාට දිගින්-දිගටම කරුණු පැහැදිලි කරමින්, අදාළ නීතිවිරෝධී ක්‍රියාව වළක්වා ගැනීමට උත්සාහ කළ නිලධාරියාට ඉන්පසුව දෙපාර්තමේන්තු මට්ටමේ පරීක්ෂණයක් පැවැත්විණි. ඉන්පසු ඔහු මින්නේරිය වනෝද්‍යානයට මාරු කර යවන ලදි.

මේජර් ජෙනරාල්ටත් සිතාසි

අදාළ සිදුවීම සම්බන්ධයෙන් මේ වන විට වනජීවී සංරක්ෂණ දෙපාර්තමේන්තුව මගින් කැකිරාව මහේස්ත්‍රාත් අධිකරණයට කරුණු වාර්තා කර ඇති අතර, මහේස්ත්‍රාත්වරයා නියෝග කර ඇත්තේ වැඩිදුර කරුණු සඳුදා (28) අධිකරණයට වාර්තා කරන ලෙසයි. එසේම එදිනට අධිකරණයේ පෙනී සිටින ලෙස අදාළ සිදුවීමට සම්බන්ධ මේජර් ජෙනරාල්වරයාට ද අධිකරණයෙන් සිතාසි නිකුත් කර තිබේ.

ආරක්ෂක අංශ සහාය !

ශ්‍රී ලංකාවේ අලි ජාවාරම සම්බන්ධයෙන් වන ප්‍රථම විධිමත් පර්යේෂණයට අදාළ පර්යේෂණ පත්‍රිකාව පසුගිය වසරේදී එළිදැක්විණි. Illegal capture and internal trade of wild Asian Elephants (Elephas maximus) in Sri Lanka නම් එම පත්‍රිකාවේ පැහැදිලිව සඳහන් කර ඇත්තේ මෙරට අලි පැටවුන් ජාවාරමට ආරක්ෂක අංශවල සහයෝගය ලැබෙන බවටයි.මෙය 2008 සිට 2018 දක්වා වසර 10ක් තිස්සේ සිදු කළ පර්යේෂණයකි.

RECENT ARTICLES - SINHALA

පිලිපීනයේ භූ කම්පනයෙන් සුනාමි අවදානමක්

පිලිපීනයේ මින්දනාඕ ප්‍රදේශයේ රික්ටර් මාපකයේ 7.6ක ප්‍රබලත්වයකින් යුත් භූකම්පනයක් හට ගෙන තිබෙනවා. පැසිෆික් සුනාමි අනතුරු ඇඟවීමේ මධ්‍යස්ථානය පවසන්නේ දකුණු පිලිපීනයට මෙන්ම ඉන්දුනීසියාව, පලාව් සහ මැලේසියාවේ...

වැඩි කළ විශ්‍රාම වැටුප ලැබෙන දිනය ගැන දැනුම් දීමක්

විශ්‍රාමික ජනතාවගේ සුබසාධනය සහ වැටුප් විෂමතා විසඳීම කෙරෙහි රජයේ විශේෂ අවධානය යොමුවී ඇති බව මුදල් රාජ්‍ය අමාත්‍ය රංජිත් සියඹලාපිටිය මහතා පවසනවා. දැරණියගල නගරයේ පැවති උත්සවයකට...

ගාසා තීරය ගැන ඇමෙරිකාවෙන් ප්‍රකාශයක්

ඊශ්‍රායලය සහ හමාස් සංවිධානය අතර යළි සටන් විරාමයක් ප්‍රකාශයට පත්කිරීම සඳහා අවශ්‍ය සහාය ලබාදෙන බව, අමෙරිකානු ආරක්ෂක ලේකම් ලොයිඩ් ඔස්ටින් මහතා පවසනවා. ඔහු ප්‍රකාශ කර...

POPULAR ARTICLES

සජබ මන්ත්‍රීවරයෙක් පක්ෂයෙන් දොට්ට

දිගින් දිගටම ආණ්ඩුවට පක්ෂව කටයුතු කිරීම හේතුවෙන් සමඟි ජන බලවේගයේ පස්සර සංවිධායක ධුරයෙන් පාර්ලිමේන්තු මන්ත්‍රී වඩිවෙල් සුරේශ්ව වහාම ක්‍රියාත්මක වන පරිදි ඉවත් කිරීමට සමගි...

සාමාන්‍ය පෙළ ප්‍රතිඵල එන දිනය මෙන්න

සාමාන්‍ය පෙළ ප්‍රතිඵල දින දෙක තුනක් ඇතුළත නිකුත් කිරීමට නියමිත බව අධ්‍යාපන අමාත්‍ය සුසිල් ප්‍රේමජයන්ත මහතා පවසනවා. ඔහු මේ බව කියා සිටියේ, කොළඹ පැවති උත්සවයකින්...

සාමාන්‍ය පෙළ ප්‍රතිඵල ගැන නිවේදනයක්

අධ්‍යයන පොදු සහතික පත්‍ර සාමාන්‍ය පෙළ විභාගයේ ප්‍රතිඵල මේ වනවිට නිකුත් කර තිබෙනවා. විභාග දෙපාර්තමේන්තුවේ නිල වෙබ් අඩවි වන  https://www.doenets.lk  සහ www.results.exams.gov.lk වෙත පිවිස ප්‍රතිඵල ලබා...