දළදා වහන්සේ රැකගන්නා මෙන් කොළඹ වරායේ නැගෙනහිර පර්යන්තය රැකගැනීමට කටයුතු කළ යුතු බව පූජ්ය ඇල්ලේ ගුණවංශ හිමියන් පවසා සිටිනවා.
පූජ්ය ඕමාරේ කස්සප හිමියන්ගේ ජන්ම දිනය නිමිත්තෙන් අභයාරාම විහාරස්ථානයේ පැවති ආශිර්වාද බෝධී පූජා පිංකමකට ඊයේ (20) පස්වරුවේ එක්වෙමිනුයි උන්වහන්සේ මේ බව සඳහන් කර සිටියේ.
එමෙන්ම, ඉතාම සංවේගයෙන් සිටින කාලපරිච්ජේදයක් උදාවී ඇති බව උන්වහන්සේ පවසා සිටිනවා.
වැඩිදුරටත් අදහස් දැක්වු පුජ්ය ඇල්ලේ ගුණවංශ හිමි,
“ඉතාම සංවේගයෙන් ඉන්න කාලපරිච්ජේදයක්. දළදා වහන්සේ රකින්නා වගේ නැගෙනහිර පර්යන්තය රකින්න අපි ඉදිරිපත් වියයුතුයි. මේ රට ආරක්ෂා කළේ අවුරුදු 2500ක් පැරණි පක්ෂ දෙකක්. ඒ තමයි ගිහි සහ පැවිදි කියන පක්ෂ දෙක. ඒ පක්ෂ දෙක විනාශ කළේ මේ කාලකණ්ණි දේශාපාලනය.
අද ඒකේ විපාක අපි විඳිනවා. මේ එන හැම ආණ්ඩුවක් ම අමෙරිකන්කාරයා, ඉන්දියන්කාරයා, චීන රට සතුටු කරන්න මහන්සි ගන්නවා මිසක් මේ ශ්රී ලංකාවේ ජනතාව සතුටු කරන්න කවදාද මහන්සි ගන්නේ.“