ශ්‍රී ලංකාවේ සියලුම ළමා සංවර්ධන මධ්‍යස්ථාන වල නේවාසිකව සිටින දරුවන්ගේ අධ්‍යාපන පහසුකම් පුළුල් කිරීමේ අරමුණින් රුපියල් මිලියන 21ක් වටිනා පරිගණක 700ක් සහ අන්තර්ජාල සබඳතා ප්‍රදානය කිරීම ආරම්භ වී ඇති බව වාර්තා වනවා.
කාන්තා හා ළමා සංවර්ධන, පෙර පාසල් හා ප්‍රාථමික අධ්‍යාපන, පාසල් යටිතල පහසුකම් හා අධ්‍යාපන සේවා රාජ්‍ය අමාත්‍ය පියල් නිශාන්ත ද සිල්වා මහතාගේ පුද්ගලික ඉල්ලීමකට අනුව මෙරට සමාගම් කීපයක පූර්ණ අනුග්‍රාහය යටතේ දිවයින පුරා විසිරී ඇති ළමා සංවර්ධන මධ්‍යස්ථාන 379ක දරුවන් 10,632 සඳහා මෙම ප්‍රදානය සිදුකෙරිණි. සංකේතාත්මක පරිගණක ප්‍රදාන වැඩසටහන 2021.9.15 දින අධ්‍යාපන අමාත්‍ය දිනේෂ් ගුණවර්ධන මහතාගේ සහභාගීත්වයෙන් බත්තරමුල්ල, ඉසුරුපාය අධ්‍යාපන අමාත්‍යාංශ පරීශ්‍රයේ දී සිදු විය.
මීට අමතරව ඩයලොග් ආසිආටා පීඑල්සී සමාගමේ අනුග්‍රාහකත්වය යටතේ සියළු ළමා සංවර්ධන මධ්‍යස්ථාන සඳහා අන්තර්ජාල සබඳතා ප්‍රදානයක් ද සිදුකෙරුණි.
මෙහිදී රැස්ව සිටි පිරිස ඇමතු රාජ්‍ය අමාත්‍ය පියල් නිශාන්ත ද සිල්වා මහතා සඳහන් කර සිටියේ මෙතරම් විශාල පරිගණක ප්‍රමාණයක් රජයේ රැකවරණ යටතේ සිටින දරුවන් වෙත ප්‍රදානය කෙරුණු පළමු අවස්ථාව මෙය බවයි.
ළමා සංවර්ධන මධ්‍යස්ථාන තුළ නේවාසිකව සිටින දරුවන්ගේ අවශ්‍යතා පිළිබඳ සාම්ප්‍රදායික දෘෂ්ටියෙන් නොබැලිය යුතු බවද ප්‍රකාශ කළ ඔහු, තමන් අමාත්‍යවරයා ලෙස තමන් නූතන ලෝකය ජය ගැනීමට දරුවන්ට අවැසි දේ සපයා දීමට නිරන්තරයෙන් උත්සාහ කරන බව ද ලෝක වාර්තාවක්ද සහිතව ප්‍රථම වතාවට එක් දිනකදී පරිගණක 700ක් පෞද්ගලික අනුග්‍රාහකත්වයකින් පරිත්‍යාග කිරීම මෙය වන බවද වැඩිදුරටත් පැවසීය.
