වර්තමානයේ මෙරට කොවිඩ් 19 ආසාදනය වන සියලු පුද්ගලයින් ජාන විශ්ලේෂණය සඳහා යොමු නොකරන බැවින් මෙරට ව්‍යාප්ත වී ඇති කොවිඩ් ප්‍රභේදවල සංඛ්‍යා දත්තවල පරස්පරතා පැවැතිය හැකි බව නියෝජ්‍ය සෞඛ්‍ය සේවා අධ්‍යක්ෂ විශේෂඥ වෛද්‍ය හේමන්ත හේරත් මහතා පවසනවා.
ඔහු වැඩිදුරටත් පවසන්නේ මෙම තත්ත්වය හේතුවෙන් ඔමික්‍රෝන් වැනි කොවිඩ් ප්‍රභේද වැළදුණු පුද්ගලයින් පිළිබඳව නිසි දත්ත ලබා ගැනීම ගැටලු සහගත බවයි.
“අපි සාම්පල් පරික්ෂාවෙන් සොයා ගන්නා රෝගීන් සංඛ්‍යාව සෑම විටම සම්පූර්ණ සංඛ්‍යාව ලෙස ගණන් ගන්න බෑ. කොවිඩ් -19 පොසිටිව් හැටියට PCR පරීක්ෂණවලට ලක්කළ සියලුදෙනාම නැවත ජාන විශ්ලේෂණයක් කරන්නේ නෑ. එවැනි තත්ත්වයක් තුළ මේ සියලුම ඔමික්‍රෝන් ප්‍රභේද අපි හඳුනා ගන්නේ නෑ. අපිට කියන්න තියෙන්නේ මේක හැම වෙලේම කොවිඩ් ද නැද්ද කියලා. එහෙමත් නැතිනම් ඔමික්‍රෝන්ද නැද්ද කියලා ඩෙල්ටා ද නැද්ද කියලා බැලු බැල්මට පෙනෙන්නේ නෑ. ඒ වගේම තමා ඔමික්‍රෝන් ප්‍රභේදය අනිත් ප්‍රභේදයන්ට වඩා වේගයෙන් හැදෙනවා කියන එක. මේ සියල්ල සිද්ධ වෙන්නේ පැතිරෙන්නට ඉඩ දුන්නොත් විතරයි. අපි පැතිරෙන්නට ඉඩ නොදී සෞඛ්‍ය සම්පන්නව හිටියොත් මේ ඔමික්‍රෝන් ප්‍රභේදය පැතිරෙන්නෙත් නෑ.”
මේ අතර මහජන සෞඛ්‍ය පරීක්ෂකවරුන්ගේ සංගමයද පවසන්නේ මේ වන විට පවත්නා කොවිඩ් තත්ත්වය සම්බන්ධයෙන් සෞඛ්‍ය අමාත්‍යාංශය නිකුත් කරන දත්ත කිසිසේත් පිළිගත නොහැකි තත්ත්වයක පසුවන බවයි.
මෙරට කොවිඩ් වසංගත තත්ත්වයක් නොමැති තත්ත්වයක් පෙන්වා දෙමින් නිකුත් කරන එම දත්ත නිසා සාමාන්‍ය ජනතාව සෞඛ්‍ය මාර්ගෝපදේශ කඩකරමින් සැහැල්ලුවෙන් ජීවත්වන බව එම සංගමයේ සභාපති උපුල් රෝහණ මහතා පෙන්වා දෙනවා.
එම නිසා නැවතත් වසංගත තත්ත්වයක් ඇති වුවහොත් ඊට සම්පූර්ණයෙන් වගකිවයුත්තේ සෞඛ්‍ය අමාත්‍යාංශය බව ඒ මහතා වැඩිදුරටත් සදහන් කරනවා.
