සංචාරක ඉන්දීය කණ්ඩායම සමග පැවැත්වෙන සීමිත පන්දුවාර ක්‍රිකට් තරගාවලිය ඉලක්ක කරගනිමින් ජෛව ආරක්ෂණ බුබුලකට යටත්ව කොළඹදී පුහුණු වීම්වලට එක්ව සිටි ජ්‍යෙෂ්ඨ ක්‍රීඩකයින් රැසකගෙන් සමන්විත ශ්‍රී ලංකා අතිරේක සංචිතයේ ක්‍රීඩකයෙක්ට කොවිඩ්19 ආසාදිත බව තහවුරු වී තිබෙනවා.
ශ්‍රී ලංකා ක්‍රිකට් ආරංචි මාර්ග News19 වෙත තහවුරු කළේ පිතිකරු සඳුන් වීරක්කොඩිට මෙලෙස වෛරසය ආසාදිත බවයි.
ඉන්දීය තරඟාවලිය ඉලක්ක කරගනිමින් ශ්‍රී ලංකා ක්‍රිකට් සංචිත දෙකක් ජෛව ආරක්ෂණ බුබුලු යටතේ වෙන් වෙන් වශයෙන් කොළඹදී සහ දඹුල්ලේදී පුහුණු සැසිවලට එක් වුණා.
සඳුන් වීරක්කොඩි සමග 15 දෙනෙකුගෙන් සමන්විත සංචිතය පුහුණු තරඟයක් සඳහා සහභාගී වීමට ඊයේ රාත්‍රි දඹුල්ලට පිටත්ව ගොස් තිබෙනවා.
ඒ අනුව බානුක රාජපක්ෂ, අසේල ගුණරත්න, ඇන්ජලෝ පෙරේරා ඇතුලු සමස්ත කණ්ඩායමම ඔවුන් රැදී සිටි කොළඹ සිනමන් ග්‍රෑන්ඩ් හෝටලයේදීම නිරෝධායනයට යොමු කර ඇතැයි ශ්‍රී ලංකා ක්‍රිකට් ආරංචි මාර්ග සඳහන් කළා.
කෙසේ වෙතත් මෙම ක්‍රීඩකයින් දඹුල්ලේදී පුහුණු වූ කණ්ඩායමේ ආශ්‍රිතයන් නොවූ බව ක්‍රිකට් ආයතනය තහවුරු කරනවා.
එංගලන්ත සංචාරය නිමවා මෙරටට පැමිණි ශ්‍රී ලංකා ප්‍රධාන කණ්ඩායමේ පිතිකරණ පුහුණුකරු ග්‍රාන්ට් ෆ්ලවර්ට සහ තරඟ විශ්ලේෂක GT නිරෝෂන කොවිඩ්19 ආසාදිත බව පසුගියදා තහවුරු කර ගැණුනා.
පවතින තත්ත්වය සැලකිල්ලට ගනිමින් ජූලි 13 වනදා ආරම්භ වීමට නියමිතව තිබූ තරගාවලිය ජූලි 18 වනදා දක්වා කල් දැමීමට දෙරටේ ක්‍රිකට් පාලක මණ්ඩල ඊයේ එකඟතාවකට එළැඹියා.
