චීනයේ හිටපු අධිකරණ ඇමතිවරයා මෙන්ම එරට පාලක කොමියුනිස්ට් පක්ෂයේ සමාජ සහ නීති සබදතා කමිටුවේ නියෝජ්‍ය අධ්‍යක්ෂ ෂෙන් හුවා හට දූෂණ චෝදනා යටතේ පරීක්ෂණයක් ආරම්භ කර ඇති බව එරට වාර්තා සදහන් කරයි.
මෑත කාලීනව චීනයේ පාලක කොමියුනිස්ට් පක්ෂයේ සහ ආණ්ඩුවේ ජ්‍යෙෂ්ඨ නායකයන්ට දූෂණ චෝදනා එල්ල වීම ඉහළ ගොස් ඇති බවත් විශේෂයෙන් එහිදී දේශපාලන සහ නීති ක්ෂේත්‍රයට සම්බන්ධ අය සිටීම කණගාටුදායක බවත් එරට විශේලේෂකයන් උපුටා දක්වමින් චීන රාජ්‍ය මාධ්‍යයක් වන ග්ලෝබල් ටයිම්ස් වාර්තා කර තිබේ.
චීනයේ මහජන ආරක්ෂාව පිළිබද නියෝජ්‍ය අමාත්‍යවරයාව සිටි මෙන්ග් හොන්ග්වෙයි හට 2020 ජනවාරි මාසයේදී දූෂණ චෝදනා මත වසර 13 ක සිර දඩුවමක් නියම විය.
චීනයේ තවත් ජ්‍යෙෂ්ඨ කොමියුනිස්ට් පක්ෂ නායකයෙකු වන පෙන්ග් බෝ පිළිබදව ද මේ වන විට දූෂණ චෝදනා සම්බන්ධයෙන් පරීක්ෂණ සිදුවෙමින් ඇති බව ග්ලෝබල් ටයිම්ස් වැඩිදුරටත් වාර්තා කර තිබේ.
