රාජපක්ෂවරුන්ට රටවිරුවන් වසංගතයක් වෙලා

රාජපක්ෂ ආණ්ඩුවට ඡන්දය ප්‍රකාශ කළ රටවිරුවන්ට අද රාජපක්ෂවරුන් සලකන්නේ වසංගතයක් සේ සලකා යැයි ජනතා විමුක්ති පෙරමුණේ දේශපාලන මණ්ඩල සභික සුනිල් හඳුන්නෙත්ති මහතා චෝදනා කළේය.
මහින්දානන්ද අඵත්ගමගේ ඇමැතිවරයා රටවිරුවන් මිනිස් බෝම්බවලට සමාන කිරීම කනගාටුවට කරුණක් යැයි ද ආණ්ඩුව කළේ තනිකරම ඔවුන්ගේ ඡන්ද කොල්ලකෑම පමණකැයි ද හඳුන්නෙත්ති මහතා චෝදනා කළේ කොළඹ පැවැති මාධ්‍ය හමුවකදීය.
අද ආණ්ඩුවට වැදගත රතු වරෙන්තු පිට සිටින ජාවාරම්කාර උදයංග වීරතුංග වැනි අය පමණක් යැයි කී හෙතෙම ශ්‍රී ලාංකිකයින්ට වඩා යුක්‍රේන ජාතිකයින් ගෝඨාභය රාජපක්‍ෂට වැදගත් වෙන්නේ ඇයිදැයි ශ්‍රී ලාංකිකයින් තේරුම් ගත යුතුව ඇතැයි ද කීය.
කුවේට් වන්දි අරමුදලේ රුපියල් බිලියන තුනක මුදල් විදෙස්ගත ශ්‍රී ලාංකිකයන් වෙනුවෙන් නොයෙදවද්දී ලංකාවට පැමිණීමට මුදල් උපයාගැනීම සඳහා ඇතැම් කාන්තාවන්ට ගණිකා සේවයේ නිරතවීමට පවා සිදුව ඇතැයි ඒ මහතා සඳහන් කළේය.
විදෙස්ගත ශ්‍රී ලාංකික ශ්‍රමිකයන්ගේ රක්ෂණ මුදල්වලට කුමක්වීදැයි ජනතා විමුක්ති පෙරමුණ ආණ්ඩුවෙන් විමසන්නේ යැයි ද හඳුන්නෙත්ති මහතා වැඩිදුරටත් සඳහන් කළේය.