කොවිඩ් වෛරසය පැතිරීම සම්බන්ධයෙන් ලංකාවේ දැන් ඇත්තේ භයානක තත්ත්වයක් යැයි සමස්ත ලංකා මහජන සෞඛ්‍ය පරීක්ෂකවරුන්ගේ සංගමය පවසයි.
නව වෛරස් ප්‍රභේද කවරාකාරයෙන් හැසිරේදැයි තාක්ෂණික විශේෂඥයන් මේ වනතුරුත් අනාවැකි පළ කර නැතැයි එහි සභාපති උපුල් රෝහණ මහතා පවසයි.
නව වෛරස ප්‍රභේදය දිවයින පුරා පැතිරීමේ අවදානමක් ඇතැයි ද තීරණාත්මක අවස්ථාවකට නැවත රට පත්ව ඇතැයි ද රෝහණ මහතා කියයි.
මෙම තත්ත්වය ප්‍රතිපත්ති සම්පාදකයන් හා පාලකයන් අවබෝධ කරගත යුතු යැයි ද රෝහණ මහතා වැඩිදුරටත් සඳහන් කරයි.
රජයේ හෙද නිලධාරින්ගේ සංගමයේ සභාපති සමන් රත්නප්‍රිය මහතා පවසන්නේ මෙම අනතුරුදායක තත්ත්වය හටගත්තේ ආණ්ඩුවේ වැරදි තීරණ නිසා බවයි.
ගුවන් හා මුහුදු සීමා පනවමින් ලෝකයේ සංචරණය නතර කර ඇති අවස්ථාවක සංචාරකයන් ගෙන්වීමට තැත්කිරීමෙන් මෙම තත්ත්වය නිර්මාණය වී යැයි රත්නප්‍රිය මහතා චෝදනා කරයි.
යුක්‍රේනයෙන් පළමු වරට රැගෙන ආ සංචාරක පිරිසේ කොවිඩ් වෛරස ආසාදිතයන් හය දෙනෙකු වාර්තා වුවත් එම ගුවන් යානයේ පැමිණි සෙසු විදේශිකයන් නිරෝධායනය නොකළේ යැයි චෝදනා කරන හෙතෙම එහි ප්‍රතිපල භුක්ති විඳීමට සිදුව ඇත්තේ මහජනතාවට යැයි ද පවසයි.
