ඔක්තෝම්බර් 1දා සිට, පියවර වශයෙන් කොවිඩ් සීමාවන් ඉවත් කිරීම සඳහා මාර්ගෝපදේශ සකස් කරන ලෙසට සෞඛ්‍ය බලධාරීන්ට ඊයේ උපදෙස් ලබාදී ඇති බව ‘ඩේලි මිරර්’ පුවත්පත වාර්තා කර සිටිනවා.
වත්මන් වසංගත තත්වය පිළිබඳව සොයා බැලීමට කොවිඩ් කාර්ය සාධක බලකාය ඊයේ රැස්වූයේ මුදල් අමාත්‍ය බැසිල් රාජපක්ෂ මහතාගේ ප්රධානත්වයෙන්. ඒ, නිව්යෝර්ක්හි පැවැත්වෙන එක්සත් ජාතීන්ගේ මහා මණ්ඩල සමුළුවට සහභාගී වීම සඳහා ජනාධිපති ගෝඨාභය රාජපක්ෂ මහතා රටින් බැහැරව සිටීම හේතුවෙන්.
කොවිඩ් තහනම ඉවත් කර, පියවර වශයෙන් රට විවෘත කිරීම සඳහා නව මාර්ගෝපදේශ සකස් කරන ලෙස මෙම රැස්වීමේදී සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතාට උපදෙස් ලැබිණි.
කොවිඩ් -19 ව්‍යාප්තිය පාලනය කිරීමට සහ මරණ අවම කිරීමට රජය අගෝස්තු 21 දින නිරෝධායන ඇඳිරි නීතිය පනවනු ලැබීය.
ඒ වනවිට දෛනිකව වාර්තා වන රෝගීන් ගණන 4,000කට ආසන්න ගණනක් වූ අතර දෛනික මරණ ගණන 250ක් පමණ විය.
කෙසේ නමුත්, සංචරණ සීමා පැනවීමෙන් අනතුරුව දෛනිකව වාර්තා වන රෝගීන් ගණන සාමාන්‍යයෙන් දිනකට රෝගීන් 1300-1,400 ක් පමණ වන අතර මරණ වාර්තා වන්නේ සාමාන්‍යයෙන් 100 ට අඩුවෙනි.
එමෙන්ම, ඊයේ පැවති රැස්වීමේදී, මෙම වසරේ අවසාන මාස දෙක තුළ අවම වශයෙන් සංචාරකයින් 200,000 ක් පමණ ආකර්ෂණය කර ගැනීම සඳහා වැඩ සැලැස්මක් ඉදිරිපත් කරන ලෙස සංචාරක ඇමති ප්‍රසන්න රණතුංග මහතාට උපදෙස් ලැබිණි.
තවද, කොවිඩ් තත්ත්වය පිළිබඳව විමසීමේදී නියෝජ්‍ය සෞඛ්‍ය සේවා අධ්‍යක්ෂ ජනරාල් වෛද්‍ය හේමන්ත හේරත් මහතා පැවසුවේ ව්ව් සම්බන්ධයෙන් නිශ්චිත යමක් කීමට කල් වැඩි බවයි.
එන්නත් ලබා ගත් නමුත් මහජනතාව සෞඛ්‍ය පියවරයන් අනුගමනය කිරීමේ අවශ්‍යතාවය ඔහු නැවත අවධාරණය කරන ලදි.
“එන්නත ලබා ගැනීමෙන් ඔබට ආරක්ෂාවක් ලැබෙනවා. නමුත්, එන්නත මඟින් ආසාදන වීම සම්පූර්ණයෙන් වළක්වා ගන්න බෑ. ඒක හරියට හෙල්මට් පැලඳගෙන බයිසිකලයක් පැදීම හා සමානයි.
ඔබ හෙල්මට් පැළඳ සිටින විට හදිසි අනතුරකදී හිසට වන තුවාල වලින් ඔබ ආරක්ෂා වෙනවා. නමුත් ඒකෙන් කියවෙන්නෙ නෑ ඔබ අනතුරකට ලක් වෙන්නෙ නෑ කියලා, ”ඔහු පැවසීය.
