2014 – 2016 කාලසීමාවේදී අප්‍රිකාවට දැඩි බලපෑමක් එල්ල කළ ඉබෝලා වෛරසයට සමාන මිනිසුන් අතර ව්‍යාප්ත විය හැකි “චැපර්“ නැමැති තවත් භයානක වෛරසයක් බොලිවියාවෙන් හඳුනාගෙන ඇති බව විදෙස් මාධ්‍ය පවසයි.
බොලිවියාවේ අගනගරය වන ලා පාස්හි වෙසෙන සෞඛ්‍ය නිලධාරීන් තුන්දෙනෙකුට මෙම වෛරසය ආසාදනය වී තිබියදී හදුනාගෙන ඇත. එම සෞඛ්‍ය සේවකයන්ගෙන් දෙදෙනෙකු වෛරසයේ බලපෑම නිසා මේ වන විට මිය ගොස් ඇති බවත් මාධ්‍ය වාර්තා කරයි.
මෙම වෛරසය ආසාදනය වු පසු උණ, ආසාමන්‍ය ලෙස ඇඟපත වේදනාව, වමනය, ලේ වහනය වීම, සමේ ආසාදන, ඇසෙහි ඇතුළත වේදනාවක් ඇති වීම සහ වෛරසය එකිනෙකා අතර ව්‍යාප්ත වන බවද හදුනාගෙන ඇත. මෙම නව වෛරසයේ බලපෑමෙන් පුද්ගලයින් මියයාමේ දැඩි අවදානමක් පවතින බවත් අමෙරිකානු රෝග පාලනය හා වැළැක්වීමේ මධ්‍යස්ථානය අනතුරු අඟවයි.
මීයන් වැනි සතුන්ගෙන් මෙම වෛරසය ව්‍යාප්ත වන බවට විශ්වාස කරන බවත් 2004 වසරේදීද බොලිවියාවේ චපාරේ ප්‍රදේශයෙන් වාර්තා වී තිබෙන අතර ඉන් පුද්ගලයින් සිව්දෙනෙකු ජීවිතක්ෂයට පත්වූ බව විදෙස් මාධ්‍ය වාර්තා කර තිබේ.
