නිමාවට පත් වූ 05 ශ්‍රේණිය ශිෂ්‍යත්ව විභාගයේ ප්‍රතිඵල සමීක්ෂණය තාවකාලිවක අත්හිටුවීමට පියවර ගෙන ඇති බව අධ්‍යාපන අමාත්‍යංශය පවසනවා.
අද (20) පැවැති මාධ්‍ය හමුවකට එක්වෙමින් එහි ලේකම් තිලකා ජයසුන්දර මහත්මිය මේ බව ප්‍රකාශ කළා.
එම විභාගයට අදාළ ප්‍රශ්න පත්‍රයක් පිටවීමේ සිද්ධියක් හේතුවෙන් මෙම තීරණය ගෙන තිබෙන බව ඇය අවධාරණය කර සිටියා.
ඒ සම්බන්ධයෙන් වන පරීක්ෂණ කටයුතු මේ වනවිට විභාග දෙපාර්තමේන්තුව සහ අපරාධ පරීක්ෂණ දෙපාර්තමේන්තුව විසින් ක්‍රියාත්මක කරන බව ද තිලකා ජයසුන්දර මහත්මිය පැවසුවා.
“අපි පහ වසර ශිෂ්‍යත්ව විභාගය තියන්නේ, දරුවන්ට ශිෂ්‍යාධාර ලබා දෙන්නට. අද මේ විභාගය තරගකාරි විභාගයක් බවට පත් වෙලා තියෙනවා. මේ විභාගය තුළ මෙවැනි සිද්ධියක් සිදු වුණා නම් අපේ කුඩා දරුවෝ තමයි බරපතළ පීඩාවට ලක්වෙලා තියෙන්නේ.ඒක නිසා අපි අමාත්‍යංශය විදිහට මේ වෙලාවේ ඉල්ලීමක් කරනවා දෙමාපියන්ට කලබල නොවී දරුවන්ගේ මානසිකත්වය නිරවුල්ව තියන්නට කියලා.මේ දරුවන්ට මේ අසාධාරණය සිදු කරන්න යම් පිරිසක් මැදිහත්වෙලා තියෙනවා නම් ඒ සියලු දෙනාට එරෙහිව ක්‍රියාමාර්ග ගන්න කටයුතු කරනවා.ඒ වගේම විභාගයේ පිළිතුරු පත්‍ර සමීක්ෂණ කටයුතු කරන්න අපි බලාපොරොත්තු වෙන්නේ නැහැ. මේ සියලු පරීක්ෂණවල ප්‍රතිඵලයක් ලැබිලා අපි තීරණයක් ගන්නා තෙක්. එතෙක් ප්‍රතිඵල නිකුත් කරන්න අවශ්‍ය සමීක්ෂණ කටයුතු සිද්ධ කරන්නේ නැහැ. ඒකත් අපි තාවකාලිකව අත්හිටුවලා තියෙනවා. පරීක්ෂණයේ ප්‍රතිඵල ලැබෙන තුරු.”
