ඉන්දියාවෙන් පළමුවරට හඳුනාගත් ‘ඩෙල්ටා’ කොවිඩ් ප්රභේදය පූර්ණ එන්නත්කරණයට ලක්වූවන්ටද ආසාදනය විය හැකි බව අනාවරණය වී ඇති බව රොයිටර් පුවත් සේවය පෙන්වා දෙනවා.
එපමණක් නොව පූර්ණ එන්නත්කරණයට ලක්වූවන් වෛරසයේ වාහකයන් බවටද පත්විය හැකි බවයි විශේෂඥයින් පෙන්වා දෙන්නේ.
කොරෝනා වෛරසයේ ඕනෑම ප්රභේදයක් හේතුවෙන් ඇති වන දරුණු සංකූලතාවයන් වලට එරෙහිව එන්නත් මගින් විශාල රුකුලක් ලැබෙන නමුත් ප්රභල සහ වේගවත්ව ව්යාප්තවන ඩෙල්ටා ප්රභේදය සම්බන්ධයෙන් විශේෂඥයින් කණස්සල්ලකින් පසුවන බවයි පැවසෙන්නේ.
එබැවින්, සම්පූර්ණයෙන්ම එන්නත්කරණය සිදුකළ රටක් වුවද මුඛාවරණ පැළඳීම, සමාජ දුරස්ථභාවය පවත්වාගෙන යාම, දෑත් සේදීම වැනි සෞඛ්ය රටාවන්ගෙන් බැහැරවීම නුසුදුසු බවයි සෞඛ්ය විශේෂඥයින් පෙන්වා දෙන්නේ.
මේ මොහොතේ ලෝකයට ඇති විශාලම අවදානම ඩෙල්ටා ප්රභේදය බවත් එය මෙතෙක් දක්නට ලැබුණු ප්රභලම සහ වේගවත්ම ප්රභේදය බවත් බ්රිතාන්ය ක්ෂුද්රජීව විද්යාඥ ෂරොන් පීකොක් පවසනවා.
ඩෙල්ටා ප්රභේදයේ ඇති භයානකම තත්වය වන්නේ එයින් රෝගී තත්වය වඩාත් උත්සන්න වීම නොව එය වඩාත් පහසුවෙන් අනෙකුන් අතර ව්යාප්ත වීම බවත් ඒ හරහා එන්නත්කරණයට ලක් නොවූවන් පහසුවෙන් ආසාදනය වී රෝහල්ගතවන ප්රමාණය ඉහලගොස් සෞඛ්ය පද්ධතිය කඩා වැටීමකට ලක්වීමක් දක්වා හේතු වීම බවයි විශේෂඥයන් පවසන්නේ.