යුවාන් වැන්ග් – 5 පර්යේෂණ නෞකාව ශ්රී ලංකාවට පැමිණීම කල් දමන්නැයි ලක් රජය චීනයෙන් ඉල්ලීමක් කර තිබියදීත් එම නෞකාව හෙට (11) හම්බන්තොට වරායට පැමිණීමට නියමිත බව NDTV පුවත් සේවය වාර්තා කරනවා.
පෙරවරු 9යි 30ට එම නෞකාව හම්බන්තොට වරයාට ළඟා වීමට නියමිත බවයි එහි දැක්වෙන්නේ.
යුවාන් වැන්ග් 5 නෞකාව ඉන්දුනීසියානු වෙරළට ඔබ්බෙන් ශ්රී ලංකාවට නිරිත දිගින් නාවික සැතපුම් 680ක් දුරින් යාත්රා කරමින් පවතින බව එන් ඩී ටීවි පුවත් සේවය වාර්තා කරනවා. පැයට නාවික සැතපුම් 14ක වේගයෙන් මෙම නෞකාව යාත්රා කරමින් පවතින බව චන්ද්රිකා දත්ත පෙන්වා දෙන බව එහි සඳහන්.
මෙම නෞකාව පර්යේෂණ නෞකාවක් ලෙස හැඳින්වුවත් අන්තර් මහද්වීපික බැලැස්ටික් මිසයිල සහ චන්ද්රිකා ස්ථානගත කිරීම් නිරීක්ෂණය කිරීමට හැකියාව තිබීම හේතුවෙන් ආරක්ෂාවට තර්ජනයක් එල්ල වේ යැයි ඉන්දීය බලධාරීන් සැක පළ කරන බව එරට මාධ්ය වාර්තා පෙන්වා දෙනවා. මේ හේතුවෙන් ඉන්දියාවේ දැඩි අප්රසාදය මෙම නෞකාව පැමිණීම සම්බන්ධයෙන් එල්ල කර ඇති අතර එවන් පසුබිම ලක් රජය ද චීනයට දැනුම් දී තිබුණේ මෙම නෞකාව පැමිණීම ප්රමාද කරන ලෙසටයි.
මතභේදයට තුඩු දී ඇති චීන නෞකාව සම්බන්ධයෙන් හිරු ප්රවෘත්ති අංශය හම්බන්තොට වරාය අධිකාරිය සදහන් කළේ අදාළ නෞකාව පැමිණීම සම්බන්ධයෙන් මෙතෙක් දැනුම් දීමක් කර නොමැති බවයි. කෙසේ වෙතත් මෙවැනි නෞකාවකට හම්බන්තොට වරායට පැමිණීමට මෙතෙක් අවසරයක් ලබා දී නොමැති බවත් වරාය අධිකාරිය ප්රකාශ කළා.
මේ අතර මිසයිල් දියත් කළ හැකි තවත් චීනයේ නිෂ්පාදිත පාකිස්ථාන යුද නෞකාවක් අනිද්දා කොළඹ වරායට සේන්දු වීමට නියමිත බව විදෙස් මාධ්ය වාර්තා කර තිබුණා. පීඑන්එස් ටයිමූර් ලෙස නම් කර ඇති මෙම නෞකාව මේ මස 15 වනදා දක්වා කොළඔ වරායේ නැංගුරම් ලා තබනු ඇති. මෙම නෞකාව බංග්ලාදේශයේ චිතගොන් වරයාට සේන්දු වීමට අවසර ඉල්ලා තිබුණත් ඩකා බලධාරීන් එය ප්රතික්ෂේප කර තිබුණා.
බංග්ලාදේශ අග්රාමාත්ය ෂෙයික් හසීනාගේ පියා පාකිස්ථානයේ සහාය ලබන කැරළි කණ්ඩායමක් විසින් 1975 වසරේ ඝාතනය කර තිබුණේ අගෝස්තු මාසයක දී බැවින් ඒ අනුව අගෝස්තු මාසය එරට ශෝක කාලසීමාවක් වීම හේතුවෙන් එසේ එම ඉල්ලීම ප්රතික්ෂේප කළ බවයි විදෙස් මාධ්ය වාර්තා කළේ. කෙසේ වෙතත්, මෙම නෞකාව පාකිස්ථානය බලා යාත්රා කරන අතරතුරයි මෙලෙස ශ්රී ලංකාවට පැමිණීමට නියමිතව ඇත්තේ.