නිවැරදි තොරතුරු යනු සත්‍යය බවත් සත්‍ය තොරතුරු දැනගන්නට, පවසන්නට හා ඒ වෙනුවෙන් පෙනී සිටින්නට බිය වන්නට එපා යැයි ජනමාධ්‍ය අමාත්‍ය ඩලස් අලහප්පෙරුම මහතා පවසනවා.
තොරතුරු දැනගැනීමේ අයිතිය පිළිබද ජාත්‍යාන්තර දිනය වෙනුවෙන් නිවේදනයක් නිකුත් කරමින් අමාත්‍යවරයා පෙන්වා දෙන්නේ වසර 5 ක කාලයක සිට මෙරට ක්‍රියාත්මක තොරතුරු දැනගැනීමේ පනත දියුණු ප්‍රජාතන්ත්‍රවාදී රටක සාධනීය ලකුණක් බැවින් ඒ සඳහා කැපවූ සියලු දෙනාට ප්‍රණාමය පුදකර සිටින බවයි.
තොරතුරු වෙත විධිමත්ව ප්‍රවේශවීම හා තොරතුරුවලට අදාළ නීතිමය පසුබිම ආදී ප්‍රායෝගික කරුණු ඉහළ විනිවිදභාවයකින් යුතු වෘත්තීමය සේවාවක් මගින් මහජනතාව වෙත ලබාදීම රාජ්‍යයක් සතු වගකීමක් බවද අමාත්‍ය ඩලස් අලහප්පෙරුම මහතා නිවේදනය මගින් පෙන්වා දෙනවා.
තොරතුරු දැනගැනීම යනු මානව අයිතියක් බවත් 21 වන සියවසේ මානව සමාජය අන් කවරදාකටත් වඩා ඒ අයිතිය වෙනුවෙන් පෙනී සිටින බවත් අමාත්‍යවරයා වැඩිදුරටත් සදහන් කරනවා.
