පාර්ලිමේන්තු මන්ත්රිවරුන්ගේ දිවා ආහාරය සැපයීම අත්හිටුවන ලෙස ඉල්ලමින් පාර්ලිමේන්තු මන්ත්රීවරුන් පිරිසක් කතානායක මහින්ද යාපා අබේවර්ධන මහතාට අද (18) ලිපියක් භාරදුන්නා.
අදාළ ලිපිය මගින් ඔවුන් ඉල්ලා සිටින්නේ ජනතාව ඉතා අසීරුවෙන් ජීවත්වන මෙම කාල පරිච්ඡේදය තුළ පමණක් තමන්ට ලබාදෙන දිවා ආහාරය අත්හිටුවන ලෙසයි.
එමෙන්ම දවස පුරා පාර්ලිමේන්තු රැස්වීම් පැවැත්වෙන දිනයන්හීදී වෙළෙඳපොළ මිල ගණන් යටතේ ආහාර පාර්සලයක් ලබාදීමට අවශ්ය කටයුතු කරන ලෙසද අදාළ ලිපියෙන් ඔවුන් ඉල්ලා සිටිනවා.
ලිපිය මගින් පාර්ලිමේන්තු මන්ත්රීවරුන් පෙන්වා දෙන්නේ පාර්ලිමේන්තු මන්ත්රීවරුන් හා පාර්ලිමේන්තු කාර්ය මණ්ඩලයේ 900 කට ආසන්න පිරිසකට දිවා භෝජනය සැපයීමට මේ වන විටත් රජය විශාල වියදමක් දරමින් සිටින බවයි.