දේශපාලකයන්ගෙන් සහ ඉහළ නිලධාරීන්ගෙන් ලැබෙන නීති විරෝධී නියෝග පිළිපැදීමට ගොස් අමාරුවේ නොවැටෙන ලෙස සියලුම ආරක්ෂක සමාජිකයන්ට තමන් දැනුම්දෙන බව හිටපු ජ්‍යෙෂ්ඨ නියෝජ්‍ය පොලිස්පති ප්‍රියන්ත ජයකොඩි මහතා අවධාරණය කරනවා.
රට තුළ වූ වර්තමාන උද්ගතවී ඇති තත්ත්වය සහ ආරක්ෂක අංශ වල කාර්යභාරය පිළිබඳ යූටියුබ් නාලිකාවක් සමඟ පැවති සාකච්ඡාවකට එක්වෙමින් ඔහු මෙම අදහස් ප්‍රකාශ කර තිබෙනවා.
දේශීය සහ ජාත්‍යන්තර අධිකරණ නඩු විභාග කිහිපයක් උදාහරණ සහිතව මතු කර දක්වමින් ඔහු සඳහන් කරන්නේ ආරක්ෂක අංශ සමාජිකයන් බැඳී සිටින්නේ දේශපාලකයන් හෝ නිලධාරීන් ආරක්ෂා කිරීම වෙනුවෙන් නොව රටේ ආණ්ඩු ක්‍රම ව්‍යවස්ථාව සහ මහජනතාවගේ ආරක්ෂාව වෙනුවෙන් බවයි.
එසේ නොකළහොත් රට තුළ බල හුවමාරුවක් සිදු වූ වහාම සිදු කෙරෙන පරීක්ෂණවලදී හෝ ජාත්‍යන්තර මට්ටමේ පරීක්ෂණ යාන්ත්‍රණයන් වල දී වරදකරුවන් බවට පත්වී දඬුවම් විදීමට අනිවාර්යයෙන්ම ඔවුන්ට සිදුවනු ඇති බව ද ඔහු අවධාරණය කරනවා.
මේ අතර පසුගියදා පාර්ලිමේන්තු වටරවුම අසල පැවති විරෝධතා පෙළපාලිය අතරතුර අංක තහඩු රහිත යතුරුපැදි වල නැගී පැමිණි යුද හමුදා සමාජිකයන් සහ පොලිස් නිලධාරීන් අතර ඇති වූ උණුසුම් තත්ත්වය පිළිබඳව ද විශ්‍රාමික ජ්‍යෙෂ්ඨ නියෝජ්‍ය පොලිස්පතිවරයා මෙහිදී අදහස් පළ කර තිබෙනවා.
ඇතැම් පුද්ගලයින්ට සහ ස්ථාන වලට ආරක්ෂාව සැපයීම සඳහා පොලිස් නිලධාරින් යෙදවීමේදී මගින් මේ වන විට පොලිස් නිලධාරීන්ගේ ආත්ම ගෞරවය බරපතළ අයුරින් කෙළෙසීමට ලක් කර ඇති බවද විශ්‍රාමික ජ්‍යෙෂ්ඨ නියෝජ්‍ය පොලිස්පති ප්‍රියන්ත ජයකොඩි මහතා මෙහිදී සඳහන් කිරීම විශේෂත්වයක්.
