ලබන වසරේ සිට වාහන ආනයනය කෙරුණද තීරු බදු රහිතව කිසිඳු පුද්ගලයෙකුට වාහන ආනයනය කළ නොහැකි බව කැබිනට් ප්‍රකාශක අමාත්‍ය බන්දුල ගුණවර්ධන මහතා පවසනවා.
එම තීරණය ගෙන ඇත්තේ, ජාත්‍යන්තර මූල්‍ය අරමුදල සමග එළැඹ ඇති ගිවිසුම්වලට අනුකූල වන අයුරින් බවයි වාර්තා වන්නේ.
මෙම වසරේ ඔක්තෝබර් පළමුවැනිදා සිට අදියර කිහිපයක් යටතේ වාහන ආනයනය කිරීමට කැබිනට් මණ්ඩලය තීරණය කර තිබෙනවා.
ඒ අනුව ඔහු සඳහන් කළේ, පළමුවෙන් ආනයනය කරනු ලබන්නේ පොදු ප්‍රවාහන සේවා සඳහා භාවිත කරන රථ බවයි.
වාණිජ සහ භාණ්ඩ ප්‍රවාහන රථ මෙම වසරේ දෙසැම්බර් පළමුවැනිදා සිට ආනයනය කෙරෙන අතර, වාහන ආනයනය සම්බන්ධයෙන් කැබිනට් ප්‍රකාශක අමාත්‍ය බන්දුල ගුණවර්ධන මහතා කියා සිටියේ,
“සියලුම වර්ගවල වාහන 2025 දෙවැනි මාසයේ පළවෙනිදා සිට ආනයනය කිරීම සඳහා අවසර ලබා දුන්නා. ඒ අනුව 2025 පෙබරවාරි 01 සිට කාර්, වෑන්, ස්පෝට් යුටිලිටි වාහන පිකප් යන ආදීය වාහන ආනයනය කිරීම සඳහා අවසර ලබාදුන්නා…
දැන් අනායන තහනම ඉවත් කළාම බලපත්‍රලාභීන්ට තමන්ගේ බලපත්‍රය අනුව වාහන ආනයනය කරන්න පුළුවන්….
ගිවිසුම් ප්‍රකාරව දශමයකින්වත් වෙනස් නොකර ඒ කොන්දේසි ඉටුකරනවා. එහි සඳහන් කරලා තියෙන්නේ හොඳ කරුණක්. කාටවත් නිදහස් ප්‍රවේශ පත්‍ර යටතේ ඇමතිවරුන්ට, මන්ත්‍රීවරුන්ට හෝ කාටවත් වාහන ආනයනය කරන්න බැහැ. කිසියම් බදු ප්‍රතිශතයක් ඇතුළත් කරන්න ඕනේ කියන ගිවිසුම… ඒ ගිවිසුමට ලංකා ආණ්ඩුව එකඟයි…”
