පාස්කු ප්‍රහාරය පිළිබඳ සොයාබැලූ ජනාධිපති කොමිසමේ වාර්තාව අසම්පූර්ණ එකක් බවත් දැනගත යුතු ප්‍රධානතම කරුණ එයින් අනාවරණය වී නොමැති බවත් අමාත්‍ය වාසුදේව නානායක්කාර මහතා පවසයි.
අමාත්‍ය වාසුදේව නානායක්කාර මහතා මේ බව පැවසුවේ ඊයේ (25) මාධ්‍යවේදීන් නැඟූ ප්‍රශ්නයකට පිළිතුරු දෙමින්.
“මගෙන් ඇහුවෙ නෑ කවුරුවත් ඔය ගැන, මේ ඇහුවාමයි. මගේ අදහස ඒක අසම්පූර්ණ වාර්තාවක්. ඒකෙ දැනගත යුතු ප්‍රධාන කරුණ දැනගන්න විදියක් ඒකෙන් ලැබිලා නෑ.
ප්‍රධානම කරුණ තමයි මේ පාස්කු ප්‍රහාරයත් එක්ක ඇතිවෙන්නට නියමිතව තිබුණු මහා කෝලාහලය ඇතිවුණා නම් මේ රටේ ඇතිවෙන සිවිල් කලබලය තුළ සැලසුමක් තිබුණාද මේ රටේ නියමිතව තිබුණු ඡන්දය නොපවත්වන්න ? MCC ගිවිසුම අත්සන් කරන්න ?
ඒ කාරණාව මම කියන්නෙ තව විමසිය යුතුයි. එහෙම නැත්නම් මේ … සහරාන්ටයි අනිත් කට්ටියටයි වුවමනාව තියෙන්න ඇති මරාගෙන මැරෙන බෝම්බයකින් පහර දෙන්න. එච්චරයි ඒගොල්ලන්ගෙ වුවමනාව. ඒකත් එක්කලා මේ රටේ කතෝලික සිංහල ජනතාවත් – මුස්ලිම් ජනතාවත් අතර විශාල කෝලාහලයක් ඇතිවෙලා එය කොතැනකට යනවාද කියන එක සහරාන් දන්නෙත් නෑ සහරාන්ට වුවමනාවකුත් නෑ. වාර්තාව අසම්පූර්ණයි”.
