පැය 03කට වැඩි කාලයක් ඉදිරියේදී විදුලිය විසන්ධි කිරීමට සිදුවනු ඇති බව ලංකා විදුලිබල මණ්ඩලයේ ඒකාබද්ධ වෘත්තීය සමිති සංධානයේ කැඳවුම්කරු රන්ජන් ජයලාල් මහතා පවසනවා.
රජය විසින් විකල්ප විදුලි බලාගාර ක්‍රියාත්මක කිරීම කෙරෙහි අවධානය යොමුකළ යුතු බවයි ඔහු පෙන්වා දෙන්නේ.
“පැය 3ක් නෙමෙයි ඊට වැඩි කාලයක් ජනතාවට විදුලිය විසන්ධි කරන්න සිද්ධවෙනවා. ඒ නිසා අපට පේනතෙක් මානයක අඩුම ගානේ අවුරුදු 5කින් 10කින්වත් බලශක්ති ක්ෂේත්‍රය නඟාසිටුවන්න මේ රටේ පාලකයින්ට සැලැස්මක් නෑ. අලුතින් ජලාශ එහෙම නැත්නම් ජල ප්‍රභවයන් බිහිවෙලා නෑ. එදා සිට තිබුණ ජලප්‍රභවයන්වලින් තමා මේ විදුලි බලාගාර හැදුවේ. ජනතාවගේ ඉල්ලුම සැපයීමට ජල විදුලිබලාගාර ප්‍රමාණවත් නෑ. ඒ නිසා සමස්ත ඉල්ලුමෙන් 40%ක් විතර තමා සපුරන්නේ ජල විදුලි බලාගාර. ඒකත් ජලය තිබුණොත්.”
මේ අතර සංචාරක හෝටල් ක්ෂේත්‍රයේ ගැටලු සම්බන්ධයෙන් එම ක්ෂේත්‍රයේ නියුතුවූවන් ඊයේ (15) මාධ්‍ය හමුවක් සංවිධානය කර තිබුණි.
එහිදී කෑගල්ල දිස්ත්‍රික් සංචාරක හෝටල් හිමියන්ගේ සංගමයේ සභාපති නයන උදයප්‍රිය මහතා සඳහන් කළේ, හෝටල්වල වහල යොදා ගනිමින් පුනර්ජනනනීය විදුලි උත්පාදනය සඳහා ආණ්ඩුව වැඩපිළිවෙළක් ඉදිරිපත් කළ යුතු බවයි.
සංචාරක ව්‍යාපාරය මුහුණ දෙන ගැටලු විසඳීම සඳහා ඉදිරි අයවැයෙන් ආණ්ඩුව යෝජනා ඉදිරිපත් කළ යුතු බව සමස්ත ලංකා සංචාරක සේවා සපයන්නන්ගේ වෘත්තීය සමිතියේ උප සභාපති ප්‍රියන්ත තිලකරත්න මහතා සඳහන් කරනවා.
