ඇමරිකා එක්සත් ජනපදයේ ජනපති ඩොනල්ඩ් ට්‍රම්ප්ගේ පදවිප්‍රාප්ති උත්සවය අමතමින් ඊලෝන් මස්ක් සිදුකළ කතාවක් අතරතුර “හිට්ලර්ගේ ආචාරයට” සමාන අභිනයක් දැක්වීම හේතුවෙන් ඔහු දෝශ දර්ශනයට ලක්ව තිබෙනවා.
ඇමරිකා එක්සත් ජනපදයේ 47වන ජනාධිපතිවරයා ලෙස ඊයේ (20) ඩොනල්ඩ් ට්‍රම්ප් දිවුරුම් දුන් අතර ඔහුව ජනාධිපති කිරීම සම්බන්ධයෙන් ට්‍රම්ප්ගේ ආධාරකරුවන් අමතමින් මස්ක් සිය ස්තූතිය පුද කර තිබුණා.
අනතුරුව මස්ක්, සිය දකුණු අත ඔහුගේ පපුවට තබා පසුව එය ඉහළට දිගු කර ඔහුගේ ඉදිරිපසින් සහ පිටුපසින් සිටි සභාව වෙත දෙවරක් ආචාර කළ ආකාරය දැක්වුණා.
X මාධ්‍යජාලය තුළ මෙම ආචාර කිරීම “හේල් හිට්ලර්” යනුවෙන් හැඳින්වෙන නාසි ආචාරයට සමාන කරමින් මස්ක්ට චෝදනා කර තිබූ අතර ඒ සම්බන්ධයෙන් මස්ක් මේ වන විට ප්‍රතිචාර දක්වා තිබෙනවා.
එම විවේචන සම්බන්ධයෙන් ඔහු සිය X ගිණුමෙහි සටහනක් තබමින් පවසා තිබුණේ, විරුද්ධවාදීන් සියලු දෙනා හිට්ලර්ට සමාන කරමින් චෝදනා කිරීම විහිළුසහගත බවයි.
ඊලෝන් මස්ක් දක්ෂිණාශිංක දේශපාලනයට වඩා නැඹුරුවෙමින් ජර්මනියේ අන්ත දක්ෂිණාංශික AfD පක්ෂයට සහ බ්‍රිතාන්‍ය සංක්‍රමණ විරෝධී පක්ෂයක් වන Reform UK පක්ෂයට සහය දක්වමින් මෑත කාලීනව විවිධ ප්‍රකාශ නිකුත් කර ඇති පසුබිමක ඔහුට මෙම චෝදනා එල්ල වීමද විශේෂත්වයක්.
කෙසේවෙතත්, ඇතැම් පාර්ශව මස්ක්ගේ මෙම ආචාර කිරීම සම්බන්ධයෙන් පවසා තිබුණේ එය ඔහු හුදෙක්ම සිය උද්‍යෝගය සහ සතුට පළ කිරීම සඳහා දැක්වූ විකාරසහගත හැසිරීමක් බවයි.
