රටේ වත්මන් තත්ත්වය තුළ හදිසි නීතිය ක්රියාත්මක කිරීම ශ්රී ලංකා පොදුජන පෙරමුණේ මුලික ප්රතිපත්තිවලට විරුද්ධ බවත් මෙම අවස්ථාවේදී රට ජාත්යන්තරය ඉදිරියේ අසරන කිරීමට එය හේතු විය හැකි බවත් එම පක්ෂයේ ආරම්භක සභාපති මහාචාර්ය ජී.එල් පීරීස් පවසනවා.
ඒ, අද (28) කොළඹදී විශේෂ මාධ්ය හමුවක් කැඳවමින්.
හදිසි නීතිය කිසිසේත් සාධාරණීකරණය කිරීමට නොහැකි බවයි ඔහු පෙන්වා දෙන්නේ.
මෙහිදී වැඩිදුරටත් අදහස් දැක්වූ මහාචාර්ය ජී.එල් පීරීස්,
“මම තමා ශ්රී ලංකා පොදුජන පෙරමුණේ, ආරම්භක සභාපති. අද රටේ පවතින තත්ත්වය තුළ හදිසි නීතිය ක්රියාත්මක කිරීම සහමුලින්ම හාත්පසින්ම ශ්රී ලංකා පොදුජන පෙරමුණේ මුලික ප්රතිපත්තිවලට පටහැනියි. මානව හිමිකම් සාක්ෂාත් කරන්න අපට සපයාදෙන සියලුම නීති අහෝසි කිරීමට, නිශ්ප්රභා කිරීමට, බිංදුවට පත්කිරීමට නීතිමට සක්යතාවයක්, බලයක් තියෙනවා හදිසි නීතිය යටතේ ප්රකාශ කෙරෙන රෙගුලාසිවලට. ශ්රී ලංකා පොදුජන පෙරමුණේ ආරම්භක සභාපති හැටියට හා නීතිය පිළිබඳ මහාචාර්යවරයෙක් හැටියට මට නම් කිසිසේත් සාධාරණීකරණය කරන්න බෑ අද දවසේ ශ්රී ලංකා තුළ පවතින තත්ත්වය අනුව හදිසි නීතිය පැනවීම. ඒ නිසා තමයි මම ඒකට විරුද්ධව ඊයේ පාර්ලිමේන්තුවේ දී මගේ ඡන්දය ප්රකාශ කළේ.”
මේ අතර එම අවස්ථාවට සහභාගී වූ ඩලස් අලහප්පෙරුම මහතා කියා සිටියේ, පසුගිය දා අනුප්රාප්තික ජනාධිපති තෝරාගැනීමේ ඡන්ද විමසීමේ දී තමාට සහාය පළ කළ මන්ත්රීවරු හදිසි නීතියට ඡන්දය ප්රකාශ නොකිරීමට එකඟතාවයකට පැමිණි බවයි.
“මේ හදිසි නීතිය පිළිබඳ විවාදයේ දී පහුගිය ජනාධිපතිවරණ කටයුත්තේ දී අපේක්ෂකයෙක් ලෙස මට සහයෝගය පළ කරපු මන්ත්රීවරු අතරේ, විශේෂයෙන්ම ආණ්ඩුව නියෝජනය කරන මන්ත්රීවරු අතරේත් අපි එකඟතාවයන් දෙකක් ගොඩනැඟුවා. එකක් තමා ඉඳුරාම මේ හදිසි නීතියට එරෙහිව ඡන්දය පාවිච්චි කිරීමට. ඒ වගේම හදිසි නීතිය ඡන්දයෙන් බැහැරවෙලා ගිහින් ආණ්ඩුවට විරෝධය පළ කරන්න. ඒ නිසා අපේ කණ්ඩායම මේ සංසිද්ධීන් දෙක වෙනුවෙන්ම පෙනී සිටිය සහෝදර මන්ත්රීවරු ඉන්නවා. ඊයේ පාර්ලිමේන්තුවේ දී 41 දෙනෙක් ඡන්දය භාවිත කරන්න පැමිණියේ නෑ. එහි අති බහුතරය කුමන කණ්ඩායමක් ද කියන එක අපේ මිත්රයින්ට සැකයක් නෑ. ඒක ඉතාම විවෘත කාරණයක් නිසා.”
ශ්රී ලංකා පොදුජන පෙරමුණ නියොජනය කරන මහාචාර්ය ජී.එල් පීරීස් , ඩලස් අලහප්පෙරුම , ඩිලාන් පෙරේරා ,ආචාර්ය නාලක ගොඩහේවා, මහාචාර්ය චන්න ජයසුමන ,වසන්ත යාපා බණ්ඩාර, උදේනි කිරිදිගොඩ ,ලලිත් එල්ලාවල , කේ. පී. එස්. කුමාරසිරි ,වෛද්ය උපුල් ගලප්පත්ති , තිලක් රාජපක්ෂ යන පාර්ලිමේන්තු මන්ත්රීවරුන් එම මාධ්ය හමුවට එක්ව සිටියා.