T20 තරග දෙකක් සඳහා ඔක්තෝබර් මාසයේදී පාකිස්තානයේ සිදුකිරීමට නියමිතව තිබූ තරඟ සංචාරය අවලංගු කරන බව එංගලන්ත ක්‍රිකට් පාලක මණ්ඩලය නිවේදනය කළා.
එංගලන්ත කාන්තා සහ පිරිමි ක්‍රිකට් කණ්ඩායම් ඔක්තෝබර් 13 සහ 14 දෙදින රාවල්පින්ඩි හිදී T20 තරඟ දෙකකටත් ඉන් අනතුරුව එංගලන්ත කාන්තා කණ්ඩායම තරඟ තුනකින් සමන්විත එක්දින තරඟාවලියකටත් සහභාගිවීමට නියමිතව තිබුණා.
එංගලන්ත ක්‍රිකට් පාලක මණ්ඩලය නිවේදනයක් නිකුත් කරමින් සඳහන් කළේ කලාපයේ සංචාරය කිරීම සම්බන්ධයෙන් වර්ධනය වී ඇති මතභේදකාරී තත්ත්වය සහ කොවිඩ් වසංගතය හේතුවෙන් සීමා සහිත පරිසරයක් තුළ කටයුතු කළ කණ්ඩායමට තවදුරටත් පීඩනයක් ඇති නොකිරීම සඳහා අකමැත්තෙන් වුවද ඔක්තෝබර් තරඟ සංචාරය සිදු නොකිරීමට තීරණය කරන බවයි.
පවතින තත්වය යටතේ තරඟ සංචාරයේ නිරත වීම එළැඹෙන T20 ලෝක කුසලාන තරගාවලිය සඳහා ගැලපෙන පෙර සූදානමක් නොවන බව අදාළ නිවේදනයේ වැඩිදුරටත් සඳහන් වනවා.
අවශ්‍යම අවස්ථාවේදී තම රට සමග සිටගැනීමට එංගලන්තය අපොහොසත් වූ බවට පාකිස්තාන ක්‍රිකට් පාලක මණ්ඩලයේ නව සභාපති රමීස් රාජා චෝදනා කළා.
එක්දින හා T20 තරඟාවලියක් සඳහා පාකිස්තානයට පැමිණි නවසීලන්ත ක්‍රිකට් කණ්ඩායම පසුගිය සති අන්තයේදී පළමු තරගය ආරම්භ කිරීමට මිනිත්තු කිහිපයකට පෙර තරගාවලිය අතහැර දැමුවේ කණ්ඩායමේ ආරක්ෂාව සම්බන්ධයෙන් ඇති වූ තර්ජනයක් හේතුවෙන්.
ඒ අනුව පැය කිහිපයක් තුල නවසීලන්ත කණ්ඩායම පාකිස්තානයෙන් ඉවත් කර ගැනීමටද එරට ක්‍රිකට් පාලක මණ්ඩලය කටයුතු කළා.
