රට තුල උද්ගතව ඇති සියලුම අර්බුදවලට වගකිව යුත්තේ වත්මන් ආණ්ඩුව බව පාකිස්තානයේ හිටපු අගමැති සහ පකිස්ථාන ටෙහ්රීක්-ඊ-ඉන්සාෆ් පක්ෂයේ(PTI) සභාපති ඉම්රාන් ඛාන් පවසයි.
පසුගියදා ලාහෝර් හි පැවති ‘නීතියේ ආධිපත්යය’ මැයෙන් වූ සමුළුවක් අමතමින් ඔහු මෙම චෝදනාව එල්ල කළේය.
රට මුහුණ දී ඇති දැවැන්ත ආර්ථික හා දේශපාලන අභියෝග පිළිබඳව සඳහන් කරමින් ඉම්රාන් ප්රකාශ කරන ලද්දේ, හිටපු හමුදා ප්රධානී ජෙනරාල් (විශ්රාමික) ජාවේඩ් බජ්වාගේ මැදිහත්වීමෙන් සිය ආණ්ඩුව පෙරලා දැමූ දිනයේ සිට රට අවිනිශ්චිත භාවය වෙත ගමන් කිරීම ආරම්භවූ බවයි.
ඉම්රාන් ඛාන් බලයෙන් පහ කරනු ලැබුවේ පසුගිය වසරේ අප්රේල් මාසයේදී ජාතික සභාවේදී විශ්වාසභංගයක් සම්මත කිරීම මගිනි. හිටපු අගමැතිවරයා පැවසූයේ එක් පුද්ගලයෙක් තම ආණ්ඩුව වෙනස් කිරීමට තීරණය කර කුමන්ත්රණයක් දියත් කළ බවයි.
ආර්ථිකය යථා තත්ත්වයට පත් කිරීම සඳහා වර්තමාන පාලනයට කිසිදු සැලැස්මක් නොමැති බැවින් ආනුව විසින් රට බරපතල ආර්ථික අර්බුදයකට ගෙනගොස් ඇති බවද ඔහු පැවසීය.
ඉතිහාසයේ කිසි දිනෙක පාකිස්තානය වර්තමානයේ මුහුණ දෙන තරම් දරුණු ආර්ථික අර්බුදයකට මුහුණ දී නොමැති බවද හෙතෙම පෙන්වාදුන්නේය.