යුරෝපා සංගමය විසින් යුක්රේනයට අවි ආයුධ මිලදීගැනීම සදහා මූල්‍යමය ආධාර සපයන බව යුරෝපා කොමිසමේ සභාපතිනි උර්සුලා වොන් ඩර් ලේන් මහත්මිය පවසනවා.
ඇය සදහන් කරන්නේ පළමු වතාවට, ප්‍රහාරයට ලක්ව ඇති රටකට ආයුධ සහ අනෙකුත් උපකරණ මිලදී ගැනීම සහ බෙදා හැරීම සඳහා යුරෝපා සංගමය මූල්‍යාධාර සපයන බවයි.
යුරෝපා සංගමය රුසියාවට එරෙහි සම්බාධක දැඩි කරන බවත්, රුසියානු මිත්‍ර බෙලරුස් ඉලක්ක කර පියවර ගන්නා බවත්, රුසියාවේ ආක්‍රමණයට එරෙහිව ආරක්ෂා වීමට යුක්රේනයට අරමුදල් ලබා දෙන බවත් එම සංගමයේ ඉහළ නිලධාරීන් ඊයේ (27) ප්‍රකාශ කළා.
යුරෝපා සංගමය පවසන්නේ රුසියානු ධනවතුන්ගේ පෞද්ගලික ජෙට් යානා ඇතුළු රුසියානු ගුවන් යානා සඳහා යුරෝපා සංගමයට අයත් රටවල්වල ගුවන් සීමාව වසා දමන බවයි.
එමෙන්ම රුසියානු රජයට අයත් රූපවාහිනී ජාලයක් වන Russia Today සහ ස්පුට්නික් ප්‍රවෘත්ති ඒජන්සිය
තහනම් කිරීමටද කටයුතු කර තිබෙනවා.
උර්සුලා වොන් ඩර් ලේන් මහත්මිය පවසන්නේ රුසියාවට පුටින්ගේ යුද්ධය සාධාරණීකරණය කිරීමට සහ අපගේ සංගමයේ බෙදීම් වැපිරීමට මෙන්ම ඔවුන්ගේ බොරු පතුරුවා හැරීමට නොහැකි වන පරිදි මෙම තීරණය ගත් බවයි.
