අපරාධ පරික්ෂණ දෙපාර්තමේන්තුව වෙත තමාව අත්අඩංගුවට ගැනීම වැළැක්වීමේ නියෝගයක් නිකුත් කරන්නැයි ඉල්ලා කතෝලික සභාවේ ජනසන්නිවේදන අධ්‍යක්ෂ සිරිල් ගාමිණී පියතුමන් ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොණුකර තිබෙනවා.
පාස්කු ඉරිදා ත්‍රස්ත ප්‍රහාරය සම්බන්ධ විමර්ශන පිළිබදව සිරිල් ගාමිණී පියතුමන් කළ ප්‍රකාශයකට එරෙහිව රාජ්‍ය බුද්ධි සේවයේ ප්‍රධානී මේජර් ජනරාල් සුරේෂ් සලේ මහතා අපරාධ පරික්ෂණ දෙපාර්තමේන්තුව වෙත පැමිණිල්ලක් කර තිබූ අතර ඒ ගැන ප්‍රකාශයක් සටහන් කරගැනීම සඳහා හෙට දින අපරාධ පරික්ෂණ දෙපාර්තමේන්තුව හමුවේ පෙනී සිටින ලෙස සිරිල් ගාමිණි පියතුමා වෙත දැනුම් දීමක් කර තිබේ.
එම ප්‍රකාශයෙන් අනතුරුව තමන්ව අත්අඩංගුවට ගැනීමේ සූදානමක් ඇති බවට තමන්ට තොරතුරු ලැබී ඇති හෙයින් එය වළක්වන ලෙස අපරාධ පරීක්ෂණ දෙපාර්තමේන්තුවට නියෝගයක් නිකුත් කරන ලෙසයි පියතුමන් ශ්‍රේෂ්ඨාධිකරණයෙන් ඉල්ලා ඇත්තේ.
පොලිස්පතිවරයා,නීතිපතිවරයා,අපරාධ පරික්ෂණ දෙපාර්තමේන්තුවේ අධ්‍යක්ෂවරයා සහ රාජ්‍ය බුද්ධී සේවයේ ප්‍රධානියා ඇතුළු 07 දෙනෙකු වග උත්තරකරුවන් ලෙස නම් කරමින් මෙම මූලික අයිතිවාසිකම් පෙත්සම ගොණු කර තිබෙනවා.
