ශ්‍රී ලංකා කාන්තා ක්‍රිකට් කණ්ඩායම් නායිකා චමරි අතපත්තුට ඇගේ තරග ගාස්තුවෙන් සියයට 10 ක දඩයක් නියම කර තිබෙනවා.
ඒ, දකුණු අප්‍රිකාවට එරෙහිව කොළඹදී පසුගිය සිකුරාදා පැවති කාන්තා තුන්කොන් ක්‍රිකට් තරගාවලියේදී ICC චර්යාධර්ම සංග්‍රහයේ 1 වන මට්ටම උල්ලංඝනය කිරීම හේතුවෙන්.
එහිදී චමරි අතපත්තු විසින්, “ජාත්‍යන්තර තරඟයක් අතරතුර ක්‍රිකට් උපකරණ හෝ ඇඳුම්, බිම් උපකරණ හෝ සවිකිරීම් සහ උපාංග අනිසි ලෙස භාවිතා කිරීම” සම්බන්ධ ICC චර්යාධර්ම සංග්‍රහයේ 2.2 වගන්තිය උල්ලංඝනය කර ඇති බවයි වාර්තා වෙන්නේ.
මීට අදාළ සිදුවීම වූයේ දකුණු අප්‍රිකානු ඉනිමේ 32 වන ඕවරයේදී ඇනරි ඩර්ක්සන් විසින් හතරේ පහරක් එල්ල කිරීමෙන් පසු අතපත්තු ඇගේ අව් කණ්ණාඩි ගලවා බිමට විසි කිරීමයි.
එහිදී ඇගේ අව් කණ්ණාඩිය කොටස් කිහිපයකට කැඩී බිඳී ගොස් තිබුණා.
