ලාදුරු රෝගය වැළඳුනු කැලෑබද ප්‍රදේශයක රිළවකු සියඹලාණ්ඩුව ඇතිමලේ ප්‍රදේශයෙන් හමුවී තිබෙනවා.
මෙම සත්වයා අප්‍රාණිකව බිම ඇදවැටී සිටියදී ප්‍රදේශවාසීන් විසින් වනජීවී කාර්යාලයට බාරදී පසුව මේ පිළිබඳව සෞඛ්‍ය අංශ දැනුවත් කර ඇති බවයි වාර්තා වන්නේ.
පසුව මොණරාගල ලාදුරු මර්දන ඒකකයේ නිලධාරීන් පැමිණ පරික්ෂණ කීපයක් සිදුකර ඇති අතර එහිදී එම සත්වයා හට ලාදුරු රෝගය වැළඳී ඇති බවට තහවුරු වී තිබෙනවා.
කෙසේ වෙතත් රෝගී රිළවා මියගොස් ඇති අතර, උගේ සිරුරේ කොටස් ලාදුරු රෝගය වැළඳුණු රෝගියකුගේ මෙන් ශරීරයෙන් ගැලවී යන අයුරුද දක්නට ලැබී තිබෙනවා.
පසුව සිරුරු කොටස් වැඩිදුර පරීක්ෂණ කටයුතු සඳහා කොළඹ ප්‍රධාන ලාදුරු මර්දන ඒකකය වෙත යවා ඇති බවයි වාර්තා වන්නේ.
මේ අතර මෙම රිළවාගෙන් තවත් රිළවුන් කිහිප දෙනකුටද ලාදුරු රෝගය වැළඳී ඇතැයි වනජීවී නිලධාරීන් සිදුකළ විමර්ශන මගින් හෙළිවී තිබෙනාවා.
ශ්‍රී ලංකාවේ ලාදුරු රෝගය වැළඳුනු සත්වයකු හමු වූ පළමු අවස්ථාව මෙය ලෙසයි වාර්තා වන්නේ.
