මෙරට විදේශ අමාත්ය මහාචාර්ය ජී එල් පීරිස් මහතා විසින් අද (14) දින ස්විට්සර්ලන්තයේ ජිනීවා නුවර පැවැත්වෙන ජගත් මානව හිමිකම් කවුන්සිලයේ 48 වන සැසිවාරය ඇමතීමට නියමිත වනවා.
මෙහිදී ශ්රී ලංකාව සම්බන්ධයෙන් වාචික වාර්තාවක් ඉදිරිපත් කරමින් මානව හිමිකම් මහ කොමසාරිස්වරිය විසින් ඊයේ දින දැක්වූ අදහස් වලට ඔහු විසින් පිළීතුරු ලබා දෙනු ඇති.
හිටපු පාර්ලිමේන්තු මන්ත්රී දුමින්ද සිල්වාට ජනාධිපති ගෝඨාභය රාජපක්ෂ මහතා සමාව දීම හේතුවෙන් රටේ නීතිය හා අධිකරණ ක්රියාවලිය කෙරෙහි විශ්වාසය බිඳ වැටීමේ අවදානම, 11 දෙනෙකු බලහත්කාරයෙන් අතුරුදහන් කිරීමේ සිද්ධියට අදාලව හිටපු නාවික හමුදාපති වසන්ත කරන්නාගොඩට එරෙහිව නඩු නොපැවරීමට නීතිපතිවරයා ගත් තීරණය, මිල පාලනය සහතික කිරීමේ අරමුණින් ශ්රී ලංකාව නව හදිසි තත්ත්වයක් ප්රකාශයට පත්කිරීම,සාමකාමී විරෝධතා හා සැමරුම් කිහිපයකට එරෙහිව අධික පොලිස් බලය යෙදවීම සහ නිරෝධායන මධ්යස්ථාන තුළ විරෝධතාකරුවන් රඳවා තබා ගැනීම, පාස්කු ඉරුදින බෝම්බ ප්රහාරයේ විමර්ශන කටයුතු, පොලිස් අත්අඩංගුවේදී සැකකරුවන් මිය යාම, මිලිටරිකරණය සහ වගවීමක් නොමැතිකම වැනි කරුණු රාශියක් සම්බන්ධව ඊයේ දින ඇය විසින් අදහස් දක්වා සිටියා.
අදාළ වාර්තාව පිළිබඳ විවාදය අද පැවැත්වෙන අතර සාමාජික රටවල් – සිවිල් සංවිධාන ඇතුලු පාර්ශව ගණනාවක් අද ශ්රී ලංකාව පිළිබඳ අදහස් දක්වනු ඇති.