ගාලු කොටුව මත ජනාධිපතිවරයාට එරෙහිව විරෝධතාවයක නිරත පිරිසකගේ විරෝධතා පුවරු ඉවත් කිරීමට යුද හමුදා නිලධාරීන් ගත් පියවරට එරෙහිව ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර තිබෙනවා.
යුද හමුදාපතිවරයා, ගාල්ල අණදෙන නිලධාරීවරයා සහ ආරක්ෂක ලේකම්වරයා වගඋත්තරකරුවන් කරමින් නීතිඥවරුන් දෙදෙනෙකු විසින් අද මෙම පෙත්සම ගොනු කරනු ලැබූවා.
ගාලු කොටුවේ සිට විරෝධතාකරුවන් විසින් අල්ලාගෙන සිටි “Go Home Gota” සහ රජයට එරෙහි සටන් පාඨ ඇතුළත් පුවරු හමුදා නිලධාරීන් විසින් ඊයේ (30) ඉවත් කිරීමට කටයුතු කළා.
කොටු පවුර මත සිට විරෝධතාකරුවන් සාමකාමී උද්ඝෝෂණයක් පවත්වා ගෙන ගිය අතර ශ්‍රී ලංකාව සහ ඕස්ට්‍රේලියාව අතර ටෙස්ට් ක්‍රිකට් තරගාවලිය ක්‍රීඩා කරන ගාලු ක්‍රිකට් ක්‍රීඩාංගණය දෙසට මුහුණලා ඔවුන් විරෝධතාවයේ නිරත වුණා.
මේ අතර, මේ සඳහා හමුදාව යෙදවීමට අවශ්‍ය වූයේ දැයි ශ්‍රී ලංකාවේ කැනඩා මහ කොමසාරිස් ඩේවිඩ් මැකිනන් ද ප්‍රශ්න කර තිබෙනවා.
“බලන්න, මම දන්නවා ශ්‍රී ලංකාවේ ක්‍රිකට් ඉතා විශාල දෙයක්, නමුත් එය හමුදාව යෙදවිය යුතු ජාතික ආරක්ෂාව පිළිබඳ ප්‍රශ්නයක්ද? පෙනෙන විදිහට මෙම සාමකාමී විරෝධතාකරුවන් උල්ලංඝනය කරන්නේ කුමන නීතියද? ”
