ජනාධිපතිවරයා සමඟ අද පැවැත්වීමට නියමිත සාකච්ඡාව වර්ජනය කිරීමට ශ්‍රී ලංකා නිදහස් පක්ෂයේ ස්වාධීන මන්ත්‍රී කණ්ඩායම තීරණය කර තිබෙනවා.
ශ්‍රී ලංකා නිදහස් පක්ෂ මහලේකම් පාර්ලිමේන්තු මන්ත්‍රී දයාසිරි ජයසේකර මහතා පවසන්නේ මෙම තීරණය හදිසියේ ගත් එකක් බවයි.
එමෙන්ම ශාන්ත බණ්ඩාර මහතා ශ්‍රී ලංකා නිදහස් පක්ෂය තුළ දැරූ සියලුම තනතුරුවලින් ඉවත්කිරීමට පක්ෂය තීරණය කළ බවද ජයසේකර මහතා පවසනවා.
අප කළ සොයාබැලීමේදී වාර්තා වූයේ ශ්‍රී ලංකා නිදහස් පක්ෂයේ මාධ්‍ය ප්‍රකාශක කුරුණෑගල දිස්ත්‍රික් පාර්ලිමේන්තු මන්ත්‍රී ශාන්ත බණ්ඩාර මහතාට රාජ්‍ය අමාත්‍ය ධූරයක් ලබාදී ආණ්ඩුවට සම්බන්ධ කරගැනීමට ජනාධිපති ගෝඨාභය රාජපක්ෂ මහතා කටයුතු කිරීම පිළිබදව ශ්‍රී ලංකා නිදහස් පක්ෂයේ අනෙකුත් මන්ත්‍රීවරුන් දැඩි අප්‍රසාදය පලකර ඇති බවයි.
පවත්නා අර්බුදය හමුවේ ශ්‍රී ලංකා නිදහස් පක්ෂය ජනාධිපතිවරයාට සහය දක්වන්නේ කෙසේදැයි සාකච්ඡා පැවැත්වෙමින් පවතින තත්ත්වයකදී නිදහස් පක්ෂයේ පුද්ගලයෙකු ආණ්ඩුවට බාගැනීමට කටයුතු කිරීම පිළිබදව ඔවුන් දැඩිව විවේචනය කර තිබෙනවා.
ශාන්ත බණ්ඩාර මහතා කෘෂිකර්ම රාජ්‍ය අමාත්‍යවරයා ලෙස දිවුරුම් දෙනු ලැබුවේ පසුගියදා ආණ්ඩුවෙන් ඉවත්ව පාර්ලිමේන්තුව තුළ ස්වාධීනව කටයුතු කරන මන්ත්‍රී කණ්ඩායමේ කෙනෙකු ලෙස සිටින අතරතුරවීම විශේෂත්වයක්.
මේ අතර පවතින නව තත්ත්වය තුළ ජනාධිපතිවරයාට එරෙහිව විපක්ෂය ගෙන ඒමට නියමිත දෝෂාභියෝගයට ශ්‍රී ලංකා නිදහස් පක්ෂය සහය දක්වනවාද නැද්ද පිළිබදව යළිත් අවිනිශ්චිතවී තිබෙනවා.
මීට පෙර ශ්‍රී ලංකා නිදහස් පක්ෂය තීරණය කර තිබුණේ අදාළ දෝෂාභියෝග යෝජනාවට සහය නොදක්වන බවයි.
