ඉන්ධන මිල යළිත් වරක් ඉහළ දැමිය යුතු බව අග්‍රාමාත්‍ය රනිල් වික්‍රමසිංහ මහතා පවසනවා.
අද (22) පාර්ලිමේන්තුවේදී විශේෂ ප්‍රකාශයක් සිදුකරමින් ඔහු පැවසුවේ රුසියානු යුක්‍රේන ගැටුම හේතුවෙන් මෙම තීරණය ගැනීමට සිදුවන බවයි.
පසුගිය සතියේදී රුසියාව විසින් යුරෝපයට ගෑස් සැපයීම සම්පූර්ණයෙන්ම නවතා දැමීම නිසා ගෑස් මිල මෙන්ම ඉන්ධන මිලද ඉහළ යන බවයි අග්‍රාමාත්‍යවරයා පවසන්නේ.
මේ හේතුවෙන් ඉදිරියේදී ඉන්ධන මිල යළිත් වරක් ඉහළ දැමීමට සිදුවන බවයි අග්‍රාමාත්‍යවරයා පෙන්වා දෙන්නේ.
මේ වන විටද ඉන්ධන මිල ජනතාවට දරාගත නොහැකි මට්ටමක පවතිනවා.
අද වන විට ඔක්ටේන් 92 වර්ගයේ පෙට්‍රල් ලීටරයක මිල රුපියල් 420 ක් වන අතර ඔක්ටේන් 95 වර්ගයේ පෙට්‍රල් ලීටරයක මිල රුපියල් 450 ක් වනවා.
එමෙන්ම ඔටෝ ඩීසල් ලීටරයක මිල රුපියල් 400ක් වන අතර සුපිරි ඩීසල් ලීටරයක මිල රුපියල් 445 ක් වනවා.
මෙවැනි තත්ත්වයක් තුළ තවදුරටත් ඉන්ධන මිල ඉහළ දැමුවහොත් මෙරට උද්ධමනය මෙන්ම ප්‍රවාහන ක්ෂේත්‍රයද සම්පූර්ණයෙන්ම කඩාවැටෙන බව ආර්ථික විශේෂඥයින් පවසනවා.
