මන්ත්රීවරුන් සඳහා සුඛෝපබෝගී වාහන ගෙන්වීමට ආණ්ඩුව ගෙන ඇති තීරණයට එරෙහිව ජනතා විමුක්ති පෙරමුණ විසින් ඊයේ (17) ශ්‍රේෂ්ඨාධිකරණය වෙත මූලික අයිතිවාසිකම් පෙත්සමක් ගොනු කර තිබෙනවා.
මූලික අයිතිවාසිකම් පෙත්සම ගොනු කරමින් ජනතා විමුක්ති පෙරමුණ සඳහන් කරන්නේ එලෙස පාර්ලිමේන්තු මන්ත්රීවරුන් සඳහා වාහන ආනයනය කිරීම සහ ණයවර ලිපි නිකුත් කිරීම නීතිවිරෝධී බවට නියෝග කරන ලෙසයි.
යම් හෙයකින් වාහන ආනයනය කරනු ලැබුවහොත්, ඊට අදාළ සියලු තීරු බදු සහ අනෙකුත් බදු අයකරන ලෙසත්, එම වාහන ප්රසිද්ධ වෙන්දේසියේ විකුණා මහජන මුදලින් දරණ ලද සියලු වියදම් සහ රාජ්ය ආදායම් අහිමිවීම් රජයට අය කර ගැනීමට කටයුතු කරන ලෙසත් අදාළ පෙත්සම මගින් ජනතා විමුක්ති පෙරමුණ ඉල්ලා තිබෙනවා.
එමෙන්ම ආණ්ඩුක්‍රම ව්‍යවස්ථාව මගින් ශ්‍රේෂ්ඨාධිකරණය වෙත ඇති අවස්ථාගත කරුණු අනුව යුක්ති සහගත හා සාධාරණ යයි ශ්‍රේෂ්ඨාධිකරණය සලකන සහන ප්‍රදානය කිරීමේ අධිකරණ බලය මත සුදුසු වෙනත් නියෝගයන්ද කරන ලෙසත් පෙත්සමේ වැඩිදුරටත් සඳහන්.
